36 myńnan astam qazaqstandyq áleýmettik qyzmetter portalyn paıdalanǵan
2020 jyly Áleýmettik qyzmetter portaly (budan ári – portal) arqyly 16,8 myńnan astam múgedektigi bar adam ońaltýdyń tehnıkalyq quraldaryna (budan ári – OTQ) jáne qyzmetterine tapsyrys berdi, 19,6 myń adam kepildik berilgen áleýmettik toptamalar (budan ári – áleýmettik toptama) alýdy resimdedi.
Portal múgedektigi bar adamdarǵa ońaltýdyń tehnıkalyq quraldary men qyzmetterin óndirýshini jáne ónim berýshini óz betinshe tańdaýǵa múmkindik beredi. Kómek túrine tapsyrys berý kórsetiletin qyzmetti alýshynyń elektrondyq tsıfrlyq qoltańbasymen rastaý arqyly júzege asyrylady. Tapsyrys berilgen OTQ-ny jetkizý nemese ózdiginen alyp ketý arqyly alýǵa bolady.
Múgedektigi bar adamdardy ońaltý quraldarymen qamtamasyz etý protezdik-ortopedııalyq, sýrdotehnıkalyq, tıflotehnıkalyq jáne gıgıenalyq quraldardy, sondaı-aq kreslo-arbalar berýdi qamtıdy.
2020 jyly portal arqyly OTQ-nyń 24 túrin satyp alý múmkindigi berildi. Ony 16,3 myńnan astam adam paıdalandy, olarǵa 28,8 myń ońaltýdyń tehnıkalyq quraldary berildi.
Qazirgi ýaqytta tizbe OTQ-nyń 67 túrin qamtıdy, ol odan ári keńeıtiletin bolady.
«Portal iske qosylǵan kezde taýardy alý áldeqaıda ońaı jáne jyldam boldy, sonymen qatar biz ony jolda baqylaı alamyz. Endi tapsyrys burynǵyǵa qaraǵanda tezirek keletinin atap ótkim keledi. Qazir jetkizý merzimi 2 aptaǵa deıin qysqartyldy. Bul óte qýantady. Al Halyqty jumyspen qamtý ortalyǵynyń qyzmetkerleri barlyǵyn túsindirip, portaldaǵy OTQ-ǵa ótinish berýge kómektesti», – dep atap ótti Qyzylorda oblysynyń turǵyny, I top múgedegi Aleksandr Gýndarev.
2020 jylǵy qazan aıynda pılottyq rejımde tapsyrys boıynsha jeke kómekshiler men ymdaý tili mamandarynyń qyzmetteri portaly arqyly, sondaı-aq sanatorıı-kýrorttyq em alý úshin uıymdy tańdaý boıynsha fýnktsıonal iske qosyldy.
2020 jyly jeke kómekshiniń qyzmetine 172 tapsyrys, ymdaý tili mamanynyń qyzmetine 157 jáne sanatorıı-kýrorttyq emdelýge 210 tapsyrys júzege asyryldy.
Budan basqa, portalda pılottyq rejımde ataýly áleýmettik kómek alýshylarǵa memlekettik áleýmettik toptama berý boıynsha fýnktsıonal iske qosyldy. Jyl qorytyndysy boıynsha 19,6 myń adam 40 myńnan astam áleýmettik toptama aldy.
Mınıstrlik ónim berýshiler sanyn arttyrý boıynsha belsendi jumys júrgizýde. 2020 jyldyń qorytyndysy boıynsha portalda 7,6 myńnan astam ońaltý quraldary men qyzmetterin jetkizýshiler tirkelgen, atap aıtqanda: arnaýly áleýmettik qyzmetter kórsetetin 828 medıtsınalyq-áleýmettik mekeme, OTQ boıynsha 25 ónim berýshi, jeke kómekshiniń 6456 qyzmeti, 156 ymdaý tili, 41 sanatorıı-kýrorttyq emdeý, 112 – áleýmettik toptama.
«Áleýmettik qyzmetter portaly» avtomattandyrylǵan aqparattyq júıesin engizý múgedektigi bar adamdardyń quqyqtaryn qamtamasyz etý jáne ómir súrý sapasyn jaqsartý jónindegi Ulttyq jospar sheńberinde kózdelgen.
Portaldy paıdalaný boıynsha keńesti call-ortalyqtan 1411 nómiri boıynsha alýǵa bolady.