36 elordalyq januıa «Mereıli otbasy» baıqaýyna qatysýǵa nıet bildirdi

ASTANA. QazAqparat - Astana qalalyq ishki saıasat basqarmasyna búgingi tańda «Mereıli otbasy» baıqaýyna qatysýǵa 36 otbasynan ótnish kelip túsken. Qujat tapsyrǵandardyń ishinde elge eńbegi sińgen bilikti dárigerler, ulaǵatty ustazdar, quqyq qorǵaý organdarynyń qyzmetkerleri, sportshylar, múmkindigi shekteýli jandar t.b. azamattar bar, dep habarlaıdy astana.kz.

Sondaı-aq Astana qalasy ákiminiń ókimimen elordada «Mereıli otbasy» baıqaýyn ótkizýge arnalǵan komıssııanyń quramy bekitildi. Oǵan 15 adam kirdi, onyń ishinde qalalyq qurylym basshylary, qalalyq ardagerler keńesi, jastar jáne qoǵamdyq uıym basshylary, partııa jetekshileri bar. Aıta keteıik, «Mereıli otbasy» jyl saıynǵy baıqaýy Qazaqstan Respýblıkasy Prezıdentiniń ókimine sáıkes ótkiziledi. Baıqaý 3 kezeńde ótedi: birinshi kezeń - aýdandyq (qalalyq), ekinshi kezeń - oblystyq, úshinshi kezeń - respýblıkalyq. Konkýrsqa qatysý úshin tıisti qujattar qosa tirkelgen ótinimder aýdandyq (qalalyq) ákimdikterge 2015 jylǵy sáýirdiń 1-nen 30-na deıin beriledi. Ótken jyly elordalyq baıqaýǵa 44 otbasy qatysqan. Aıta keteıik, «Mereıli otbasy» baıqaýy ónegelilik qundylyqtaryn jańǵyrtýǵa jáne otbasynyń oń úlgisin taratýǵa, onyń mártebesin arttyrýǵa baǵyttalǵan. Baıqaýǵa eńbekte, sportta, shyǵarmashylyq, zııatkerlik, ǵylymı joǵary jetistikteri bar otbasylardyń músheleri qatysa alady.