347 myńnan astam adamǵa MÁSQ-tan tólenetin áleýmettik tólemder mólsheri arttyryldy

NUR-SULTAN. QazAqparat - Memlekettik áleýmettik saqtandyrý qorynan (budan ári – MÁSQ) tólenetin úsh áleýmettik tólemniń mólsheri ulǵaıtyldy. Bul shara 347,7 myń adamǵa áser etti. Bul týraly QazAqparat QR Eńbek jáne halyqty áleýmettik qorǵaý mınıstrliginiń baspasóz qyzmtine silteme jasap habarlaıdy.

Aǵymdaǵy jylǵy 1 qańtardan bastap eńbek etý qabiletinen aıyrylǵan jaǵdaıda (75 130 alýshy) jáne asyraýshysynan aıyrylǵan jaǵdaıda (52 096 alýshy) MÁSQ-tan tólenetin aı saıynǵy áleýmettik tólemderdiń mólsheri 5% - ǵa arttyryldy.

Bul tólemder uzaq merzimdi bolyp tabylady, óıtkeni olar birneshe jyl boıy tólenýi múmkin: eńbek etý qabiletinen aıyrylǵan jaǵdaıda – adam eńbekke qabilettiligin qalpyna keltirmeıinshe ne zeınetkerlik jasqa jetkenshe; asyraýshysynan aıyrylǵan jaǵdaıda – balalarǵa kámeletke tolǵanǵa deıin jáne kúndizgi oqý nysanynyń stýdentterine 23 jasqa deıin júzege asyrylady.

Aıta ketý kerek, joǵaryda atalǵan tólemderdi alýshylar bıýdjet qarajaty esebinen osyndaı memlekettik áleýmettik járdemaqylardy da alady.

Sondaı-aq, osy jylǵy 1 qańtardan bastap AEK mólsheriniń ulǵaıýyna oraı bala kútimine baılanysty tabysynan aıyrylǵan jaǵdaıda MÁSQ-tan 1 jasqa deıingi aı saıynǵy áleýmettik tólem mólsheri arttyryldy. Bul shara 220 462 alýshyǵa áser etti.

Esterińizge sala keteıik, joǵaryda atalǵan áleýmettik tólemniń mólsheri balanyń týǵan kúnine deıingi sońǵy 2 jyldaǵy ortasha tabystyń 40% - yn quraıdy. Bul rette bul áleýmettik tólemniń eń tómengi mólsheri ustalýǵa jatatyn mindetti zeınetaqy jarnalaryn qosymsha esepteı otyryp, «Balaly otbasylarǵa beriletin memlekettik járdemaqylar týraly» Zańǵa sáıkes týylǵan balanyń kezektiligine qaraı belgilengen aı saıynǵy memlekettik járdemaqy mólsherinen kem bolmaýǵa tıis.

Joǵaryda kórsetilgen barlyq áleýmettik tólemderdiń mólsherin arttyrý MÁSQ aktıvteri esebinen júzege asyryldy. Osylaısha, áleýmettik qamsyzdandyrýdyń qosymsha nysanyn alýda jumys isteıtin halyqtyń múddeleri qorǵaldy.