337 mln teńge shyǵyn keltirgen: Túrkistan oblysynda 34 jastaǵy er adam ustaldy
Kúdikti jábirlenýshilerge «aqsha qarajattaryńyzdy kóbeıtip beremin» dep senimderine kirip, attarynan onlaın-nesıe rásimdegen. Alaıaqtyq jolmen tapqan qarajatty jeke basynyń paıdasyna jaratyp otyrǵan.
Tekserý kezinde kúdiktiniń jalpy 87 jaıtqa qatystylyǵy dáleldendi. Jábirlenýshilerge keltirilgen shyǵyn kólemi 337 mıllıon teńgeden asqan. Kúdikti qamaýǵa alyndy.
Sonymen qatar, tártip saqshylary ınternet-alaıaqtyq qylmystaryna qatysy bar 22 jastaǵy jigitti qolǵa túsirdi. Ony polıtseıler Almaty qalasynan ustady. Kúdikti áleýmettik jelide jıhaz qurastyrý boıynsha jalǵan paraqshalar ashyp, jábirlenýshilerden tapsyrys qabyldap, aqshalaryn ıemdenip otyrǵan.
Kúdiktiniń Túrkistan oblysy aýmaǵynda 4 qylmystyq iske, al respýblıka boıynsha 18 iske qatystylyǵy anyqtalyp otyr. Tergeý jalǵasyp jatyr.
«Bul qylmystar «Anti-fraud» jedel-profılaktıkalyq is-sharasynyń birinshi táýliginde anyqtaldy. Jalpy is-sharanyń alǵashqy táýliginde Túrkistan oblysynyń polıtseıleri joǵarydaǵy qylmystardan bólek, buryn tirkelgen 5 qylmysty ashty. 18 dana kontrafaktilik ónimder tárkilendi» - delingen Túrkistan oblysy polıtsııa departamentiniń baspasóz qyzmeti usynǵan aqparatta.