333 myń adam eńbek bırjasynyń arqasynda jumysqa ornalasty

NUR-SULTAN. QazAqparat - 333 myń adam Elektrondy eńbek bırjasynyń arqasynda jumysqa ornalasty. Bul týraly QR Eńbek jáne halyqty áleýmettik qorǵaý vıtse-mınıstri Serik Shapkenov aıtty, dep habarlaıdy QazAqparat tilshisi.

«Elektrondy eńbek bırjasy óte jaqsy quralǵa aınaldy. Qazirdiń ózinde 54 jumyspen qamtý ortalyǵy, 203 jumyspen qamtý memlekettik ortalyǵy jáne 7 onlaın jumyspen qamtý alańy, 234 myńnan astam jumys berýshi eńbek bırjasyna tirkelgen. 1 mln 100 myń adam túıindemesin qaldyrǵan. 1 aqpan men 1 tamyz aralyǵynda Elektrondy eńbek bırjasyna túıindemesin qaldyrǵan azamattardyń sany 7,9 ese ósip otyr. Al bos jumys oryndaryn tirkeý 8 ese artty. Bul Elektrondy eńbek bırjasynyń halyq qoldanatyn quralǵa aınalǵanyn kórsetedi», - dedi ol Ortalyq kommýnıkatsııalar qyzmetindegi baspasóz máslıhatynda.

Vıtse-mınıstrdiń dereginshe, 333 myń adam osy eńbek bırjasynyń arqasynda jumysqa ornalasqan. Onyń 190 myńy turaqty jumys ornynda eńbek etýde.

«Qazirdiń ózinde elimizdiń eńbek naryǵynda 47 myń bos jumys orny tirkelgen. Osy bos oryndarǵa azamattardyń jumysqa ornalasý múmkindigi bar», - dedi Serik Shapkenov.