33 jer ýchaskesi memleket menshigine qaıtaryldy

ASTANA. QazAqparat - Sybaılas jemqorlyqqa qarsy qyzmet Áleýmettik-kásipkerlik korporatsııalardyń (ÁKK) qyzmetkerleriniń jer ýchaskelerin berý kezinde laýazymdyq ókilettikterdi teris paıdalaný faktileri boıynsha 10 sotqa deıingi tergep-tekserý sharalaryn bastaldy, dep habarlaıdy QazAqparat.

Antıkordyń málimetinshe, tekserýler Básekelestikti qorǵaý jáne damytý agenttigi usynǵan materıaldar boıynsha júrgizilýde.

«Astana qalasynda, Jambyl, Qaraǵandy jáne Soltústik Qazaqstan oblystarynda sotqa deıingi tergep-tekserý barysynda 65 jer ýchaskesi belgilendi. Olardy jergilikti atqarýshy organdar «Astana», «Taraz», «Saryarqa» jáne «Soltústik» ÁKK ınvestıtsııalyq jobalar úshin bergen. Bul rette ÁKK basym qyzmet túrleriniń tizbesine engizilgen ınvestıtsııalyq emes jobalardy iske asyrý úshin jer jáne kásipkerlik kodeksterdiń talaptaryn buza otyryp, zańdy tulǵalarǵa jer ýchaskelerin rásimdegen», - dep jazdy vedomstvo.

Mysaly, Qaraǵandy oblysynda 2019-2021 jyldar aralyǵynda Qaraǵandy, Balqash, Jezqazǵan jáne Sátbaev qalalarynyń ákimdikteri «Saryarqa» ÁKK-na 36 jer ýchaskesin berip, onyń 14-i Kásipkerlik Kodeksiniń normalaryn jáne qalalardyń bas josparyn buza otyryp berilgen.

Soltústik Qazaqstan oblysynda Petropavl qalasy ákimdiginiń qaýlylary negizinde «Soltústik» ÁKK úshin 6 jer ýchaskesi berildi. Odan keıin olar saýda-sattyqsyz qurylys salýshylarǵa berildi. Astana qalasy men Jambyl oblysynda da osyǵan uqsas buzýshylyqtarmen sáıkesinshe 8 jáne 5 ýchaske bergen.

«Sybaılas jemqorlyqqa qarsy qyzmettiń aýmaqtyq departamentteriniń usynysy boıynsha ákimdikter zańsyz berilgen 33 jer ýchaskesin memleket menshigine qaıtarǵan. Osylaısha, qabyldanǵan sharalar memlekettiń zańmen qorǵalatyn múddelerine zııan keltirýdiń aldyn aldy», - delingen habarlamada.