320 myńnan astam qazaqstandyqtyń banktegi shottarynan shekteýler alyndy
16:23, 07 Sáýir 2020
NUR-SULTAN. QazAqparat – Bıylǵy 4-6 sáýir aralyǵynda memlekettik kirister organdary jeke kásipkerler men jeke praktıkamen aınalysatyn tulǵalardyń 320 myńnan astam banktik shottaryna qoıylǵan shekteýler alynyp tastaldy, dep habarlaıdy QazAqparat.
QR Qarjy mınıstrligi Memlekettik kirister komıtetinen málim etkendeı, bul, 42500 teńge kólemindegi áleýmettik járdemaqyny alýyna múmkindik berý úshin jasaldy.
«Memleket basshysynyń tapsyrmasyn oryndaý sheńberinde Memlekettik áleýmettik saqtandyrý qorynan tótenshe jaǵdaıǵa baılanysty tabysynan aıyrylǵan adamdarǵa 42500 teńge somasynda aı saıynǵy áleýmettik kómekti aýdarý bastaldy. Osyǵan oraı, óńirlik Memlekettik kirister departamentteri táýekel dárejesi joǵary salyq tóleýshilerdi qospaǵanda, jeke kásipker retinde tirkelgen jeke tulǵalarǵa jáne jeke praktıkamen aınalysatyn tulǵalarǵa qatysty shyǵarylǵan bank shottary boıynsha shyǵys operatsııalaryn toqtata turý týraly ókimder men ınkassalyq ókimderdi keri qaıtarýda», - delingen aqparatta.