32 zamanaýı kópbeıindi aýdandyq aýrýhana salynady – mınıstrlik

ASTANA. QazAqparat – Aldaǵy eki jylda elimizde 32 zamanaýı kópbeıindi aýdandyq aýrýhana paıdalanýǵa beriledi. Bul jaıynda Densaýlyq saqtaý mınıstrliginen QazAqparattyń resmı saýalyna oraı málim etti.

«Ulttyq jobada tıisti bólimshelerdi (ınsýlttik jáne kardıologııalyq ortalyqtar, medıtsınalyq ońaltý, travmatologııa jáne ortopedııa, hırýrgııa, jansaqtaý jáne qarqyndy terapııa bólimsheleri) asha otyryp, sonymen qatar olardy kúrdeli jóndeý, ǵımarattardy jańartý (nemese japsarlas ǵımarat salý), medıtsınalyq quraldarmen jabdyqtaý arqyly 32 zamanaýı kópbeıindi aýdandyq ortalyq aýrýhana uıymdastyrý josparlanǵan. Atalǵan jańartylǵan 32 nysandy paıdalanýǵa berý 2024-2025 jyldarǵa kózdelip otyr», - dep atap ótti mınıstrlikten.

Vedomstvo málimetinshe, júrgizilip jatqan jumystardyń aıasynda respýblıkalyq jáne jergilikti bıýdjetten 5 nysandy (Aqmola oblysynda – 1, Qostanaı oblysynda – 1, SQO-da – 1, Túrkistan oblysynda - 2) kúrdeli jóndeýge qarajat bólingen. Onyń ishinde Túrkistan oblysyndaǵy 2 nysandy jóndeý jumystary bastalyp ketti. Al qalǵan úsh oblysta qurylys-montajdaý jumystaryn merdiger uıymdardy anyqtaýǵa baǵyttalǵan konkýrstyq rásim aıaqtalǵannan keıin bastaý josparlanyp otyr.

«Munan bólek, búginde taǵy 4 nysandy (Almaty oblysynda – 1, ShQO-da – 1, Jambyl oblysynda – 1, Qaraǵandy oblysynda - 1) kúrdeli jóndeý úshin jobalyq-smetalyq qujattama ázirlendi. Al 10 nysannyń (Jambyl oblysynda – 2, Qaraǵandy oblysynda – 1, Qyzylorda oblysynda – 4, Abaı oblysynda – 2, Almaty oblysynda - 1) jobalyq-smetalyq qujattamasy saraptamadan ótip jatyr. Qalǵan nysandardyń jobalyq-smetalyq qujattamasy ázirlený ústinde», - dep atap ótedi mınıstrlikten.

Buǵan deıin elimizde 100-ge jýyq densaýlyq nysanynyń qurylysy bastalǵanyn jazǵan edik.