31 jyl buryn Qulsarydaǵy sý tasqyny qalaı bolǵan

<p>ATYRAÝ. KAZINFORM &mdash; Atyraý oblysyndaǵy Jylyoı aýdanynyń ortalyǵyn 1993 jylǵy kóktemde tasqyn sý astynda qalǵan. Sol kezde Qulsary kent atalatyn edi.</p>

Budan 31 jyl burynǵy sý tasqynyna kýá bolǵan Ábdihalyq Sısenberdıevtyń aıtýynsha, 1993 jylǵy sý tasqyny týraly aldyn ala habarlanbaǵan. Aýdan ortalyǵy — Qulsary kenti sol kezdiń ózinde birneshe aýylǵa bólingen. 

«Qulsarynyń dál qasynda Qamyskól dep atalatyn kól bar. Bul kólge sý Jem ózeninen bastaý alatyn Qursaı ózeginen quıylady. Sol kezde ózektiń jaǵalaýy bıiktetilmedi. Jem ózeninen quıylǵan sý Qursaı ózeginiń arnasynan asyp, Qulsarydaǵy birneshe aýyldy basty», - dep eske aldy Ábdihalyq Sısenberdıev. 

Foto: Á. Sısenberdıevtiń jeke muraǵatynan

Onyń pikirinshe, Qulsaryny basqan tasqyn sý bir aıdaı turǵan. Keıin kóshelerdegi batpaq tez keýip úlgermegen. 

«Sol kezde 1 myńnan astam turǵyn úıdi sý basty. Turǵyndar tasqyn sýdan úreılenip, jan-jaqqa qashty. Qulsarynyń shaǵyn aýdandarynda bos turǵan kópqabatty úılerge kirýge áreket jasady. Biraq, jergilikti ákimdik qansha úıdiń bos turǵanyn bilmedi, turǵyndarǵa kirýge múmkindik bermedi. Baspanasyz qalǵandar sol úılerdiń esigin buzyp kirgen edi», - deıdi Ábdihalyq Sısenberdıev. 

Tasqyn sý ketkennen keıin ǵana tazalaý jumysy bastalǵan. Sý basqan úılerdi jóndeý qolǵa alynǵan. 

«Árıne, tabıǵı apattan Qulsarynyń turǵyndary zardap shekti. Bul — shyndyq. Zardap shekken turǵyndarǵa negizinen qurylys materıaldary, ýaqytsha panalaý úshin birneshe kıiz úı, keıbirine aqshalaı kómek berildi. Aqshalaı kómekti mekemeler usyndy. Biraq, baspanasy búlingen turǵyndardyń bári birdeı qamqorlyqqa alyndy deı almaımyz. Kóptegen turǵyn baspanany ózderi saldy. Keıin „Teńizshevroıl“ kompanııasy Qulsaryda bir qabatty 20 úı salyp berdi», -deıdi Ábdihalyq Sısenberdıev. 

Jem ózeni sýynyń aǵysyn báseńdetý úshin Qyzylqoǵa aýdanyndaǵy Muqyr aýylynan Qulsaryǵa tikeleı qatynaıtyn jol eki-úsh jerden buzylǵan.

Foto keıipkerdiń jeke muraǵatynan

Sondaı-aq, Jylyoı aýdanynyń Omartoǵaı ýchaskesindegi jáne burynǵy «Embi» keńsharynyń aýmaǵyndaǵy «Qyzyljar» ótkelderdi buzýǵa týra kelgen. 

«Sol 1993 jylǵy sý tsqynynyń bir sebebin ǵana aıtqan jón. Bul — Qursaı ózeginiń jaǵalaýy ábden shógip, alasarǵany. Qulsarydaǵy aýyldardy sý basqannan keıin ǵana ózektiń jaǵalaýy bıiktetile bastady. Biraq, bul óte kesh edi», -dedi sý tasqynynyń kýágeri.

Eske sala ketelik, buǵan deıin Atyraýdaǵy Jylyoı aýdanynan 35 myńǵa jýyq turǵyn evakýatsııalanǵanyn jazǵan edik.