31 naýryz. QazAqparat kúntizbesi
ATAÝLY KÚNDER
Rezervtik kóshirme jasaý (bekap) kúni
Bul kún aqparatty qorǵaý men ony saqtaýdy qamtamasyz etýge qoǵamnyń nazaryn aýdarý maqsatynda belgilengen. Rezervtik kóshirme jasaý, bul – qosymsha aqparat tasymaldaýshy quralǵa qujattyń kóshirmesin jasaý protsedýrasy. Rezervtik kóshirmeniń qajettiligine erekshe mán bergen Reddıt saıtynyń qoldanýshylary Bekap kúnin atap ótý týraly usynys jasap, bastama kóterdi. Bul kún nelikten 31 naýryzǵa belgilen? 1 sáýir kúni kúlki kúnine oraı jibergen vırýstary málimetterdi joıyp jiberýi jıi kezdesedi. Al Bekap kúni dál sol aqparattardy saqtaý kerektigin eske salady.
ESTE QALAR OQIǴALAR
1995 jyly alǵash ret Ulttyq banktiń memlekettik saqtaý qoımasyna «Balqash-LTD» taý-ken kompanııasynyń alǵashqy altyn quımasy jetkizildi.
1995 jyly «Qazposhta» álemdik mádenıet qaıratkerleri men uly Abaıdyń 150 jyldyǵyna arnalǵan poshtalyq markalardy shyǵardy.
1998 jyly Qazaqstanda Prezıdenttiń qoldaýymen Qazaq ulttyq mýzyka akademııasy (QazUMA) quryldy.
2011 jyly Vashıngtonnyń «Carnegie Institution for Science» tanymal ǵımarattarynyń birinde «Kazakh Cinema Evenings» qazaqstandyq kınofestıvali ashyldy. Festıvaldiń birinshi kúninde tanymal qazaqstandyq rejıser Rústem Ábdirashevtiń qazaq halqynyń toleranttylyǵy týraly baıandaıtyn «Stalınge syılyq» atty fılmi kórsetildi.
2015 jyly Ekinshi dúnıejúzilik soǵystaǵy Jeńistiń 70 jyldyǵyna arnalǵan «Uly Jeńiske – 70 jyl» atty estelik monetasy shyǵaryldy. Nomınaly – 500 teńge.
2016 jyly Vashıngton qalasynda ıAdrolyq qaýipsizdik jónindegi sammıt barysynda Qazaqstan men AQSh-tyń ıadrolyq qaýipsizdik jáne taratpaý salasyndaǵy yntymaqtastyq týraly birlesken málimdemesi qabyldandy.
2016 jyly QR Mádenıet jáne sport mınıstrligi QR Ulttyq mýzeıiniń qoryna Shyǵys Qazaqstan oblysyndaǵy qorǵandardan tabylǵan 968 arheologııalyq eskertkishti tapsyrdy.
2017 jyly FIDE Prezıdent keńesinde 17 jastaǵy qazaqstandyq shahmatshy Jansaıa Ábdimálik International Master (erler arasyndaǵy halyqaralyq sheber) ataǵyn aldy. Ol Qazaqstan shahmatshylarynyń arasynda alǵashqylardyń biri bolyp International Master dárejesin ıelendi.
2018 jyly Almaty oblysynyń Raıymbek aýdany: Kegen aýdany (ortalyǵy – Kegen aýyly) jáne Raıymbek aýdanyna (ortalyǵy – Narynqol aýyly) bólindi.
2020 jyly Memleket basshysy Qasym-Jomart Toqaev respýblıkalyq telearnalardyń efırinen elimizdegi tótenshe jaǵdaıǵa (pandemııaǵa baılanysty) jáne memlekettiń daǵdarysqa qarsy is-sharalaryna baılanysty málimdeme jasady. Prezıdent daǵdarysqa qarsy negizgi segiz is-sharany usyndy. Birinshisi – ınflıatsııanyń artýyna baılanysty zeınetaqy, memlekettik járdemaqy jáne ataýly áleýmettik kómek mólsherin 10 paıyzǵa ındeksatsııalaý. Ekinshisi – ózin-ózi jumyspen qamtyǵandar men resmı tirkelmeı jumys isteıtinderge 42500 teńge kóleminde tóleý. Úshinshisi – turmysqa qajetti zattar men azyq-túlikti tegin alatyn azamattardyń qataryn kóbeıtý. Tórtinshisi – mindetti áleýmettik medıtsınalyq saqtandyrý júıesi boıynsha saqtandyrylmaǵan azamattardyń medıtsınalyq kómek alý quqyǵyn 1 sáýirden 1 shildege deıin uzartý. Besinshisi – shaǵyn jáne orta bıznes ókilderin bıylǵy 1 qazanǵa deıin eńbekaqy tóleý qorynan ustalatyn salyqtan bosatý. Altynshysy – «Jumyspen qamtýdyń jol kartasy» baǵdarlamasy boıynsha jumys istegisi keletin azamattarǵa jalaqysyna qosymsha 85 myń teńge tóleý. Jetinshisi – aýyl sharýashylyǵymen aınalysatyn kásipkerlerge qoldaý kórsetý. Segizinshi – barlyq sharalardy oryndaý úshin Úkimet pen Ulttyq bank barlyq qajetti qarajat kózderin paıdalana alady.
2021 jyly Túrki tildes memleketter yntymaqtastyǵy keńesiniń beıresmı sammıtinde «Túrkistan deklaratsııasy» qabyldandy. Keńeske múshe elder Túrkistannyń túrki halyqtaryn biriktirýdegi erekshe rólin aıta kelip, ony Túrki áleminiń rýhanı astany dep jarııalady.
2022 jyly «Ulytaý» ulttyq tarıhı-mádenı jáne tabıǵı qoryq-murajaıynyń qyzmetkeri, eńbek ardageri jasy jetpisti alqymdaǵan aqsaqal Sársenbaı Qotyrashov Qazaqstannyń sheksiz keńistigin jaıaý aralap shyǵýǵa bel býdy. «Men bul marafonǵa jeti jyl boıy daıyndaldym. Maqsatym – óńirlerdegi qolóner sheberlerimen kezdesý, jurtqa Ulytaý tarıhyn tanystyrý jáne «Kókmaısa» festıvalin nasıhattaý. Osy úshin qazaqstannyń barlyq óńirin jaıaý aralap shyǵamyn. Barǵan jerlerimnen Qazaqstannyń eń myqty qolóner sheberleriniń tizimin jasaımyn», dedi ol.