30 jylda eki zań ǵana qazaqsha jazylǵan – senator

<p>Parlament Senatynyń depýtaty, Áleýmettik-mádenı damý jáne ǵylym komıtetiniń tóraǵasy Nurtóre Júsip zańdardyń memlekettik tilde jazylýy úshin qandaı sharalar qolǵa alynǵanyn aıtyp berdi, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

«30 jylda eki aq zań memlekettik tilde ázirlengen. Eń irisi – Ákim Ysqaq negizdegen «Kóshi-qon týraly zań» jáne Farıza Ońǵarsynova atsalysqan balalarǵa baılanysty ilespe zań. Qalǵandary oryssha jasalady. Zańdy buryn Úkimet ózi jasaıtyn. Zań jobalary Ádilet mınıstrliginde tujyrymdama jasalady, sosyn Parlamentke usynylady. Sol kezde barlyq zańdardyń mátinderi orys tilinde týyp, qazaq tiline aýdarylady. Bul tájirıbe áli de jalǵasýda», - dedi depýtat Jibek joly telearnasyndaǵy Ýáde» baǵdarlamasynda.

Nurtóre Júsip bul jerde úlken másele aýdarmada ekenin basa aıtty.

«Senat alǵash kelip, zańnyń qazaqsha mátinderin qaraǵanda óte óreskel qaıshylyqtardy kórdik. Tipti Makedonııamen aradaǵy ratıfıkatsııa boıynsha Syrtqy ister mınıstrligine, Bas prokýratýraǵa arnaıy hat joldap, ol nota Makedonııaǵa joldanyp, bir aıdan keıin memlekettik tildegi mátindi durystap qaıtarǵan jaǵdaı boldy. Parlament tarıhynda mundaı oqıǵa bolmaǵan. Qazir áriptestermen aqyldasa kele, jobalyq keńse qurdyq, oǵan Senat tóraǵasynyń orynbasary Jaqyp Asanov myrza jetekshilik etedi. Qazir zańdardy memlekettik tilde ázirleý máselesi týraly eki-úsh otyrys ótkizdik. Osyǵan baılanysty depýtattar bastamasymen jańa zań jobasyn ázirleý múmkindigi bar. Taıaýda Úkimettiń oń qorytyndysyn aldyq, Ǵylym týraly zańǵa ózgerister men tolyqtyrýlar engizý máselesine qatysty zańdy negizinen memlekettik tilde jasap, sodan orys tiline aýdaryp, Májilis qaraýyna usynamyz», - dedi Senat depýtaty.

Spıkerdiń aıtýynsha, Senat portfelinde basqa da zań jobalalary bar jáne 2024 jyly sol zańdar negizinen memlekettik tilde ázirlenedi.

«Bári oıdaǵydaı bolsa Senat bastamasymen kelesi sessııaǵa deıin 5-6 zań qabyldanyp qalýy múmkin. Soǵan oraı tájirıbeli, bilikti aýdarmashylarmen, Ádilet mınıstrliginiń mamandarymen, zańgerlerimen jumys istep jatyrmyz. Qazaq tilin jaqsy biletin mamandar bar, memlekettik tilde zań daıarlaýdyń esh qıyndyǵy joq», - deıdi Nurtóre Júsip.