30 jastaǵy polıtseı: Adal qyzmetker – zań men ádilet saqshysy

ALMATY. QazAqparat - Qoǵam tynyshtyǵy men azamattardyń quqyǵyn qorǵaýda qazaq polıtsııasynyń orny bólek, tuǵyry bıik. Bıyl qazaq polıtsııasynyń qurylǵanyna – 30 jyl. Quqyq qorǵaý organynda qyzmet etetin qanshama qyzmetker kúni búginge deıin halyqtyń ystyq yqylasyna bólenip, alǵys arqalap júr. Solardyń biri Qazaqstan polıtsııasymen qurdas Oljas Ospanov. Polıtsııa maıory QazAqparat tilshisine tańdap alǵan mamandyǵy jaıynda aıtyp berdi.

Qazaq polıtsııasymen túıedeı qurdas Oljas Ospanov 1992 jyly Almaty oblysy, Qazaqstan aýylynda dúnıege keldi. 2007 jyly Baýyrjan Momyshuly atyndaǵy respýblıkalyq áskerı mektep-ınternatqa oqýǵa tústi.

«Men mektep kezinen polıtsııada qyzmet etýdi armandadym, mektepti bitirgennen keıin esh oılanbastan polıtsııada jumys isteýdi tańdadym. Osylaısha úlken yqylaspen áskerı ýchılışeni bitire salysymen ІІM Akademııasyna «quqyq qorǵaý qyzmeti» mamandyǵy boıynsha oqýǵa túsip, ony oıdaǵydaı bitirdim», – deıdi polıtsııa maıory Oljas Ospanov.

Joǵary oqý ornyn aıaqtaǵan soń ol tergeýshi qyzmetine taǵaıyndaldy, kásipti meńgerip, basshylyq qyzmetke jetti. Búginde Almaty qalasy Túrksib aýdandyq polıtsııa basqarmasy janyndaǵy anyqtaý bóliminiń basshysy.

«Qylmystyq isterdi tergeý – úlken jaýapkershilikti talap etetin aýyr jumys. Adamnyń taǵdyry soǵan baılanysty, sondyqtan da tergeý jáne anyqtaý organdarynyń óz isine adal qyzmetkerleri zań men ádilet saqshysy. Polıtsııa qyzmetkeri – eń aldymen, aq pen qarany ajyrata bilýi kerek», - deıdi ol.

Tártip saqshysy qyzmet barysynda jınaǵan tájirıbe men bilim tańdap alǵan mamandyǵyńa adal bolýǵa septigin tıgizetinin aıtty.

«Osyndaı jaǵdaıda qyzmetkerlerdiń ıntellektýaldy deńgeıi únemi damý ústinde bolatyny eshkimge qupııa emes. Únemi ózin-ózi tárbıeleýmen aınalysatyn, analıtıkalyq oılaý qabileti bar erýdıtti adamdar ǵana kúrdeli qylmystyq isti ashady, zań buzýshylardyń yqtımal áreketin boljaı alady. Іshki ister organdary júıesinde 10 jyldan astam ýaqyt jumys istesem de, tańdaýyma esh ókingen emespin. Mamandyqty qaıta tańdaýǵa týra kelse, men dál osylaı jasar edim», – dedi Oljas Ospanov.

Keıipkerimiz joǵary qabatty úıdiń terezesiniń syrtyna shyǵyp alǵan 4 jasar qyzdy qalaı qutqarǵanyn eske aldy.

«Polıtsııa qyzmetkeri bolǵan soń túrli oqıǵalardyń kýási bolasyn. Mysaly, «Juldyz» yqshamaýdanynda ornalasqan kópqabatty úılerdiń birinde Sabına esimdi 4 jasar qyzdy aman alyp qaldym. Kúndizgi kezekshilikten keıin úıime kele jatqan edim, bir top adam men joǵary qabattaǵy terezeniń syrtyna shyǵyp, jylap turǵan kishkentaı qyzdy kórdim. Sol kezde esh oılanbastan óz mindetimdi oryndadym. Joǵary kóterilip, kórshi páter arqyly qyzdyń ómirin saqtap qaldym. Meniń bul áreketim esh jerde, ıaǵnı áleýmettik jelide, teledıdarda kórsetilmedi, biraq mundaı jaǵdaıda bul árbir polıtsııa qyzmetkeriniń mindeti dep bilemin», - deıdi ol.

Búgingi kúni Oljas Ospanov eki balanyń ákesi. Jubaıy ekeýi bir qyz, bir uldy tárbıelep otyr.