30 protsenttik ústemeaqy: Eljan Birtanov qaı qyzmetkerlerdiń jalaqysy ósetinin aıtty

ASTANA. QazAqparat - QR Densaýlyq saqtaý mınıstri Eljan Birtanov Prezıdent tapsyrmasy aıasynda qaı qyzmetkerlerdiń jalaqysy kóteriletinin aıtty. Búgin «Nur Otan» partııasynyń XVIII sezinde Memleket basshysy Nursultan Nazarbaev 1 shildeden bastap jalaqysy tómen bıýdjettik sala qyzmetkerleriniń aılyǵyn 30 protsentke kóterýdi tapsyrdy, dep xabarlaıdy QazAqparat tilshisi.

«Elbasy tikeleı tapsyrma berip jatyr. Bıýdjettik sala qyzmetkerleriniń jalaqysyn 30 protsentke kóterý kerek. Jalpy, búginde bizdiń salada 60 myńnan astam dáriger jumys isteıdi. Sonymen qatar, 170 myń meıirbıke bar. Budan bólek, sanıtarlar, ınjenerler, býxgalter-ekonomıster bar, qosymsha 400 myńnan asa adam eńbek etedi. Árıne, kóbiniń jalaqysy 100 myńnan tómen. Birinshiden, osy tizimderdi qarap, esep-qısabyn jasap, iske asyrýǵa daıyndaımyz. Osy maqsatta qosymsha qarjy bólindi. Bıyl 1 shildeden bastap tómen jalaqy alatyn barlyq medıtsına salasynyń qyzmetkerleri qosymsha ústemeaqy alady», - dedi E.Birtanov jýrnalısterge bergen suxbatynda.

Mınıstrdiń aıtýynsha, aǵymdaǵy jyly 1 qańtarda medıtsına qyzmetkerleriniń jalaqysyn 20 protsentke kóterý sharalary bastaldy.

«Ony mańyzdy aýrýlar boıynsha arnaıy baǵdarlamany oqyǵan dárigerler men meıirbıkelerge qosyp jatyrmyz. Qazirgi kezde qyzmetkerlerdiń 17 protsenti oqýdan ótip, jalaqyǵa qosymsha 20 protsenttik ústemeaqyny aldy. Endi Elbasy tómen jalaqy alatyn bıýdjettik mekeme qyzmetkerleriniń jalaqysyn 30 protsentke kóterýdi tapsyryp otyr. Bul - óte qýanyshty jaǵdaı», - dep atap kórsetti E.Birtanov.

Aıta keteıik, búgin Memleket basshysy Nursultan Nazarbaev jalaqysy tómen bıýljettik sala qyzmetkerleriniń aılyǵyn kóterý úshin qosymsha qarjy bólýdi júktedi.

«Osy jyldan bastap qańtar aıynda bazalyq aılyq mólsherin bir jarym esege ósirdik. Muǵalimderdiń aılyǵyn 30 paıyzǵa, biliktiligin arttyrǵan ustazdarǵa 50 paıyzǵa arttyrdyq. Demek, osy sanattaǵy azamattardyń kirisi aıtarlyqtaı ósti. Bul baǵdarmada bir mıllıon azamattyq qyzmetkerdi qamtıdy. Osy jyldyń 1 shildesinen bastap bıýdjet salasyndaǵy aılyǵy tómen qyzmetkerlerdiń jalaqysyn 30 paıyzǵa arttyrýdy tapsyramyn. Biz olardy qoldaýymyz kerek. Osy maqsatta 2019-2021 jyldary qosymsha 980 mlrd teńge bólinetin bolady», - dedi Nursultan Nazarbaev «Nur Otannyń» kezekti sezinde.

Budan bólek, densaýlyq saqtaý salasyn damytýǵa qosymsha 120 mlrd teńge bólinedi.