30 ıgi is: ShQO-da muqtaj jandarǵa azyq-túlik jıyntyǵy taratyldy

ÓSKEMEN. QazAqparat – Shyǵys Qazaqstan oblystyq Dostyq úıi jyl basynan beri muqtaj jandarǵa 10 mln teńge somasyna qaıyrymdylyq kómek kórsetken, dep habarlaıdy QazAqparat tilshisi.

Qazaqstan halqynyń birligi kúni qarsańynda ShQO etnomádenı birlestikteriniń músheleri az qamtylǵan jáne kópbalaly otbasylarǵa qaıyrymdylyq kómek kórsetýde.

Jýyqta 3 balany tárbıelep otyrǵan Gúlden Eleýdına men 5 balasy bar Danıra Malıkovaǵa azyq-túlik jıyntyǵy berildi.

«Qasıetti Ramazan aıynda ıgi ister jasaý ádetke aınalǵan. Etnomádenı birlestigimiz kóptegen jyldar boıy túrli qaıyrymdylyq aktsııalaryn iske asyryp keledi. Soǵys ardagerlerine, qart adamdarǵa jáne kópbalaly otbasylarǵa kómek kórsetýdemiz», - dedi sheshen-ıngýsh etnomádenı birlestiginiń tóraıymy Tatıana Kagermanova.

Atalmysh shara Qazaqstan Respýblıkasy Táýelsizdiginiń mereıtoıyna arnalǵan «30 ıgi is» qaıyrymdylyq marafony aıasynda ótti.

«Biz ıgi isterimizben jastardy meıirimge tárbıelegimiz keledi. Olar úshin úlgi bola bilýimiz kerek. Sondyqtan armıan mádenı ortalyǵy barlyq qaıyrymdylyq aktsııalardy qoldaıdy», - dedi armıan etnomádenı birlestiginiń tóraǵasy Stepanıan Anýshavan.

Aıta keteıik, osy jyldyń basynan beri ShQO Dostyq úıi 10 mln teńge somasyna qaıyrymdylyq kómek kórsetken.

Muqtaj jandarǵa azyq-túlik jıyntyǵy, medıtsınalyq maska men dári-dármek taratyldy.

Osy baǵyttaǵy sharalar aldaǵy ýaqytta da jalǵasyn tappaq.