3 JEO salýda tańdaý nelikten Reseıge tústi – Sátqalıevtiń túsindirmesi

<p>Energetıka mınıstri Almasadam Sátqalıev Kókshetaý, Semeı jáne Óskemen jylý elektr ortalyqtaryn salý úshin tańdaý nelikten Reseıge túsip otyrǵanyn aıtty, dep habarlaıdy Kazinform.</p>

«Ózara túsinistik týraly memorandýmǵa qol qoıdyq. Qujat Qazaqstanda jylý elektr ortalyǵyn salýǵa ózara múddelikti bekitedi. Elektr energetıkasy salasyn damytý josparyna sáıkes, Kókshetaý, Semeı jáne Óskemende JEO salý kózdelgen. Buǵan deıin mınıstrlik ashyq ınvestıtsııalyq tender negizinde atalǵan stansalardyń qurylysyna qatysty jumys júrgizgen edi. Tenderler ótken joq», - dedi mınıstr Aqordada BAQ ókilderine bergen suhbatynda.

Onyń aıtýynsha, atalǵan nysandardy salýǵa nıet tanytqan ınvestorlar tabylmaı otyr.

«Atalǵan JEO-lar kómirmen jáne gazben jumys isteýi tıis bolýyna baılanysty birshama másele bar. Bul rette ol kómirmen jumys isteıtindikten halyqaralyq qarjy ınstıtýttary qarjylandyrýǵa daıyn emes. Shyǵaryndylarǵa, ıaǵnı qorshaǵan ortany qorǵaýǵa qatysty barynsha qatań talap qoıdyq. Atalǵan konkýrstarǵa qatysýǵa, óz taraptarynan qarjymen qamtamasyz etýge daıyn elderdiń kóp bolmaýyna baılanysty osy memorandýmǵa qol qoıdyq jáne reseı tarapynyń Qazaqstanda iri JEO salý protsesine qatysýǵa múddeliligin bekittik. Biz qurylystyń bastan-aıaq salyǵanyna qyzǵýshylyq tanytamyz. ıAǵnı, bas merdiger tek salyp qana qoımaı, paıdalanýǵa berý, iske qosý jáne retke keltirý jumystaryn qamtamasyz etýi qajet. Nátıjesinde biz Qazaqstannyń ekologııalyq, tehnıkalyq, eksplýataýııalyq standarttaryna saı jumys isteıtin energetıkalyq nysan alýymyz qajet. Qazir bastapqy satysy bolǵandyqtan ázirshe, somasyn aıta almaımyn. Eger, jyldyń sońyna deıin úkimetaralyq kelisimge qol qoıatyn bolsaq, onda tyńǵylyqty jobalaýǵa kezeńine shamamen jarty jyl ketedi dep oılaımyn. Menińshe, kelesi jyly qurylys jumystaryna kirisetin shyǵarmyz», - dedi Almasadam Sátqalıev.

Osy oraıda mınıstr JEO salý úshin nelikten tańdaý Reseıge túskendigin túsindirdi.

«Biz birneshe márte konkýrs ótkizdik. Biraq, eshkim qyzyǵýshylyq tanytpady. Bul usynysty nıettestik turǵysynan qarastyramyz. Kelissózder sátti aıaqtalǵan jaǵdaıda dál osy reseılik merdigerlermen jobany júzege asyrýǵa kóshýge múmkindik bolady. Reseılik tarap usynysynyń basymdyǵy – bul qarjylandyrýǵa, úzdik tehnologııalardy usynýǵa daıyndyǵy. Munyń ústine reseılik áriptesterdiń Qazaqstannyń kúrdeli, kúli kóp kómirin jaǵýda biregeı tájirıbesi bar», - dedi ol.