3 jasar bala Túrkııadan Qazaqstandaǵy týǵan anasyna qaıtaryldy

<p>ASTANA. KAZINFORM &ndash; Oqý-aǵartý mınıstrligi Balalardyń quqyqtaryn qorǵaý komıteti QR azamaty 3 jasar qyzdyń óz anasyna oralǵany týraly habarlady. Balany Túrkııa Respýblıkasynyń aýmaǵynda úshinshi tulǵalar zańsyz ustaǵan.</p>

«Kishkentaı qyzymyzdyń aman-esen oralýy úshin orasan zor jumys atqaryldy. Barlyq quzyretti organdar osy protseske tartylyp, dıplomatııalyq arnalar arqyly tıisti hattar jiberildi. Sondaı-aq, kóptegen kezdesýler men kelissózder júrgizildi. Bul barlyq qatysýshy taraptardyń úılesimdi jáne kásibı jumysynyń arqasynda múmkin boldy. Qazaqstan Respýblıkasynyń azamaty bolyp tabylatyn árbir bala qorǵaýsyz qalmaıdy. Biz balalardyń týǵan elinde qaýipsiz, ári súıispenshilikke toly ortada ósip-órkendeýi úshin bar kúshimizdi salamyz. Barsha qatysýshy taraptarǵa osy mańyzdy istegi qoldaýy men yntymaqtastyǵy úshin alǵys aıtamyz», - dep atap ótti QR Oqý-aǵartý mınıstrligi Balalardyń quqyqtaryn qorǵaý komıtetiniń tóraıymy Nasymjan Ospanova.

Aıta keteıik, QR Oqý-aǵartý mınıstrliginiń Balalardyń quqyqtaryn qorǵaý komıteti halyqaralyq bala urlaýdyń azamattyq-quqyqtyq aspektileri týraly Konventsııany iske asyrý jónindegi ýákiletti organ bolyp tabylady. Komıtet balalardyń qaýipsizdigi men týǵan otbasylaryna oralýyn qamtamasyz ete otyryp, olardyń quqyqtary men múddelerin qorǵaýda belsene atsalysyp otyr.