Altyn adam tabylǵan ShQO aýylynda ınternet joq

<p>ÓSKEMEN. KAZINFORM &ndash; Shilikti aýyly Shyǵys Qazaqstan oblysyndaǵy Zaısan aýdanynda ornalasqan. 2003 jyly úshinshi altyn adam tabylǵan bul eldi mekendi óńir ǵana emes, muqym respýblıka jurtshylyǵy biledi. Dese de áıgili aýyl áli kúnge deıin ınternetke jarymaı otyr.</p>

Taıaýda Shilikti aýylynyń halqy Kazinform redaktsııasyna habarlasty. Olardy tolǵandyrǵan másele – ınternettiń joqtyǵy.

«Aýylǵa bıyl ınternet tartý jumystary qarqyndy bastaldy. Sony kórgende bárimiz qýanyp, bir-birimizge súıinshilep júr edik. Biraq bul jumystardyń aıaǵy sıyrquıymshaqtanyp ketkendeı. Shamamen aýyldan 15 shaqyrymdaı jerge tok baǵanalaryn tartyp, taý basyna munaraǵa deıin ornatyldy. Tarbaǵataı aýdany jaqtan da bir munara ornatyp qoıdy. Oǵan tok tartý jumystary múlde bastalǵan joq. Bılik ókilderi ınternet osy jyldyń qyrkúıek aıynda tartylyp qoıady dep edi. Alaıda olaı bolmady», - dedi aty-jónin atamaýdy suraǵan aýyl turǵyny.

Bul tek bir aýyldy emes, aýyldyq okrýg jurtshylyǵyn mazalap otyrǵan másele. Shilikti aýyldyq okrýginde barlyǵy 360 úı bar. Onda 1500-ge jýyq adam turyp jatyr.

«Ákimdikke habarlasyp, qashan ınternet qosylatynyn talaı márte suradyq. Dese de naqtysyn aıtpaı otyr. Sol jaǵyn bilip berseńizder», - dedi shiliktilikter.

Sony bilý úshin Zaısan aýdany ákimdigine saýalhat jiberip kórdik. Resmı jaýapty aýdan ákiminiń orynbasary Danııar Serikov berdi.

«Shilikti aýyly turǵyndary aýdan ákimdigine ınternet qosyp berý boıynsha alǵash ret 2023 jyly ótinish bildirdi. Bıyl aýylǵa ınternet tartý úshin baǵanalar ornatylyp, munara qoıylǵany ras. Biraq ınternetti iske qosý 2025 jylǵa josparlanǵan», - dedi ol.

Bıyl ınternetke qajetti munaralardy ornatý jumystary Shiliktiden bólek, Tasbastaý, Jańaturmys aýyldarynda da júrgizilgen eken.

«Qazirgi ýaqytta aýdan boıynsha ınternet Qabyrǵatal, Shúrshitsý, Qarasaı, Kakentaldy, Aqaral, Qosqara, Daýal, Sátpaı, Muqashı, Aqqoıyn aýyldarynda tartylmaǵan. Aýdan aýyldaryna ınternet tartý úshin tıisti jumystar júrgizilip jatyr», - dedi Danııar Serikov.

ShQO tsıfrlandyrý jáne arhıvter basqarmasynyń málimetine súıensek, búginde aımaq boıynsha 155 aýyl turǵyndary ınternetsiz otyr. Bul 250 adamnan az adam turatyn shaǵyn eldi mekender. Uıaly baılanys operatorlaryna olarǵa tıisti jabdyqtardy ornatý tıimsiz. Sondyqtan «Qoljetimdi ınternet» ulttyq jobasy qolǵa alynǵan.

«Sonyń aıasynda 2027 jyldyń sońyna deıin barlyq aýyldy kezeń-kezeńimen ınternetpen qamtamasyz etý josparlanǵan. Osy jyldyń basynan oblys boıynsha 29 eldi mekenge ınternet tartyldy. Sondaı-aq 148 mektepte Starlink spýtnıktik ınterneti ornatyldy. 18 antennalyq-machtalyq qurylymnyń qurylysy júrgizilip jatyr», - delingen aqparatta.

Eske salsaq, osyǵan deıin Túrkistan oblysy shekara mańyndaǵy aýyldar joǵary jyldamdyqty ınternetke qosylǵany habarlanǵan.