«3 qyzdy jabylyp sabaǵan»: Semeı polıtsııasy qylmystyq is qozǵady

SEMEI. QazAqparat – Semeı qalasynda dámhana mańyndaǵy tóbeleske qatysty kúdiktiler anyqtaldy, dep habarlaıdy QazAqparat tilshisi.

Áleýmettik jelide Semeıdegi dámhanalardyń birindegi tóbelestiń vıdeosy tarady. Onda «8 áıeldiń 3 qyzdy jabylyp sabaǵandary» jaıly jazylǵan.

Abaı oblystyq Polıtsııa departamenti qazirgi ýaqytta tóbeleske qatysqandardyń kim ekendigi anyqtalǵanyn málim etti.

«Atalǵan faktige qatysty ortalyq polıtsııa bólimi QR QK 293-baby 2-bóligi boıynsha sotqa deıingi tergeý amaldarynyń bastalǵanyn habarlaıdy. Tártip saqshylary janjalǵa qatysqan 21-29 jas aralyǵyndaǵy qala turǵyndaryn anyqtady. Búginde tergeýdiń tolyqtyǵy men obektıvtiligin qamtamasyz etýge baǵyttalǵan sharalar júrgizilýde», - delingen departamenttiń baspasóz qyzmeti taratqan aqparatta.

Ázirge áıelder arasyndaǵy daýdyń neden týyndaǵany belgisiz.

Vedomstvo málimetinshe, Qylmystyq-protsestik kodekstiń 201-baby 1-bóligine sáıkes sotqa deıingi tergep-tekserýdiń derekteri jarııa etilmeıdi.