3 qańtar. QazAqparat kúntizbesi
ESTE QALAR OQIǴALAR
1992 jylyQazaqstan Respýblıkasy men Qytaı Halyq Respýblıkasy arasynda elshiler deńgeıinde dıplomatııalyq qarym-qatynas ornatý jóninde birlesken mazmundamaǵa qol qoıyldy.
1996 jyly Qazaqstan Respýblıkasynyń Memlekettik avtoınspektsııasy ataýy Jol polıtsııasy bolyp ózgertildi.
2005 jyly Pavlodarda Sovet Odaǵynyń Batyry Mahmet Qaıyrbaevqa eskertkish taqta ornatyldy. M. Qaıyrbaev (1925-1996) – 1943 jyly Kalının jáne Belarýs maıdandarynda polk, batareıany basqarǵan. Soǵys jyldary 2 ret Otan soǵysy, Aleksandr Nevskıı ordenderimen, medaldarmen marapattalǵan. 1944 jyly 19 jastaǵy qazaqstandyq maıdanger Shaýlıaı túbindegi shaıqasy úshin Keńes Odaǵynyń Batyry atandy. Soǵystan keıingi jyldary da eren eńbegi úshin eki ret Eńbek Qyzyl Tý ordenimen marapattalǵan.
2007 jyly Parıjde qazaqtyń tanymal jazýshysy, M. Sholohov atyndaǵy halyqaralyq syılyqtyń ıegeri Sábıt Dosanovtyń «Aq Arýana» atty kitaby frantsýz tilinde jaryq kórdi. Kitaptyń alǵy sózin kórnekti ádebı synshy Alber Fıshler jazdy. Aýdarmasyn jasaǵan – belgili frantsýz aýdarmashysy Anrı Avrıl.
2008 jyly Varshavadaǵy Qazaqstannyń Elshiligi qoǵamǵa jáne polıaktardyń jas býyn ókilderine ortaazııalyq barys jáne Qazaqstan týraly kórkem sýrettermen bezendirilgen kitaptyń kompakt-dıskisin alǵash ret basyp shyǵardy. Birinshi tanystyrylym «Meniń Qazaqstanym» («Moj Kazachstan») dep atalady, onda Qazaqstan Respýblıkasynyń mádenı murasy, tarıhı eskertkishterdiń áserli fotosýretteri, ádebıet jáne mýzyka óneriniń belgili qaıratkerleri, Qazaqstandaǵy 130 ulttyń kıimderi, Qazaqstan Respýblıkasynyń Prezıdenti Nursultan Nazarbaevtyń basqa respýblıkalardyń basshylarymen halyqaralyq kezdesýleri, Astana jáne Almaty qalalary týraly tolyq aqparat 142 slaıdta beıneldengen. Ekinshi tanystyrylym «Qazaqstannyń ınvestıtsııasy» («Inwestycje w Republice Kazachstanu»), ol Qazaqstan Respýblıkasynyń ınvestıtsııalyq jáne ınnovatsııalyq jobalary, ekonomıkalyq ahýaly, ekonomıkalyq saıasaty týraly tolyq aqparat beretin 22 slaıdtan turady.
2018 jyly Atyraý oblysynyń aýdan ortalyǵynda halyq batyry Mahambet Ótemisulyna arnalǵan eskertkish boı kóterdi. Eskertkish batyrdyń esimi berilgen Mahambet aýylynyń ortalyq alańynda ornatylǵan. Eskertkishtiń avtory – músinshi, Qazaqstan Sýretshiler odaǵynyń múshesi Serik Mátenııazov. Monýmenttiń jalpy bıiktigi – 10 metr 80 sm. Músin qoladan jasalǵan, salmaǵy – 5 tonna. Qoladan quıylyp, tuǵyry temir-betonmen jasalyp, granıtpen qaptalǵan.
2019 jyly kınematografııa salasynda qoǵamdyq qatynastardy retteıtin, quqyqtyq, ekonomıkalyq jáne uıymdastyrýshylyq negizdemelerdi anyqtaıtyn «Kınematografııa týraly» Qazaqstan Respýblıkasynyń Zańy kúshine endi.