3% bólip tóleý: EKSPO aýmaǵyndaǵy páterler jańa tártippen satylady

ASTANA. QazAqparat -EKSPO-2017 aýmaǵynda ornalasqan turǵyn úılerdi satý qaıta bastalady, dep habarlaıdy QazAqparat tilshisi.

Eske salsaq, 2018 jyldyń 16 qańtarynan bastap jyljymaıtyn múlikti satyp alýǵa ótinim qabyldaý ýaqytsha toqtatylǵan edi.

OKQ-da ótken búgingi baspasóz máslıhatynda «Báıterek development» AQ basqarma tóraǵasynyń orynbasary Asqarbek Óserbaev turǵyn úılerdi ótkizý 15 aqpannan bastap satýdyń jańa mehanızmi iske qosylǵanyn habarlady.

Naqtyraq aıtqanda, kompanııa EKSPO aýmaǵyndaǵy turǵyn úıdi halyqqa jyldyq 3 paıyzben 12 jylǵa bólip tóleý arqyly ótkizýdi kózdeıdi. Jańa mehanızm boıynsha turǵyn úıdi satyp alý úshin satyp alýshy kelesi sharttardy oryndaýy kerek:

1) Tólem qabiletin rastaý;

2) Turǵyn úı qunynyń 20 paıyzynan kem bolmaıtyn mólsherde bastapqy jarna salý;

3) 3 aılyq tólem mólsherinde kepildik jarnasyn salý;

4) Satyp alynǵan turǵyn úıdi bólip tóleý kezeńine saqtandyrý.

«Tólemdi bólip tóleý mehanızmi boıynsha tek 1 páter jáne 2-den aspaıtyn kólik turaǵynyń oryndaryn satyp alýǵa bolady. Satyp alý-satý sharty boıynsha tólemdi bólip tóleý merzimi ótinish berýshiniń 70 jasqa tolýymen shekteledi. Búgingi tańda «Báıterek development» AQ jańa mehanızminiń negizgi sharttaryn pysyqtaýdy aıaqtap, qajetti ishki qujattar bekitilgen. Ótinish berýshi protsesin avtomattandyrý jáne ótinish berýshiniń tólem qabilettiligin tekserý is-sharalary aıaqtalý kezeńinde tur», - deıdi Asqarbek Óserbaev.

Ótinish berýshiniń ótinimi burynǵysha Digital Baiterek portaly arqyly júzege asyrylady. Ótinish berýshiniń jańa mehanızmdi tańdaýy úshin «tólem tásili» baǵanynda «bólip tóleý arqyly ótkizý» qyzmetin kórsetýi jáne qarjylaı múmkindigine qaraı bastapqy jarnasynyń mólsherin ózi belgileýi qajet. Ótinishi berýshiniń tólem qabilettiligin esepteý «Qazaqstannyń Turǵyn úı qurylys jınaq bank» AQ elektrondyq platformasy arqyly júzege asyrylady.

Ótkizýdiń jańa ádisiniń engizilýine qaramastan turǵyn úıdi buryn qoldanylǵan mehanızmderi boıynsha: jeke qarajaty esebinen nemese EDB qary qarajatyn alý jolymen (ıpotekalyq nesıeleý) satyp alýǵa bolady. Satýǵa usynylatyn turǵyn úılerden 193 páter «7-20-25» baǵdarlamasynyń sharttaryna sáıkes keledi.