3,6 myń jambyldyq maman «Dıplommen aýylǵa» barǵan

TARAZ. QazAqparat – «Dıplommen – aýylǵa» baǵdarlamasy aıasynda jambyldyq 3,6 myń jas jumyspen qamtyldy, dep habarlaıdy QazAqparat oblys ákimdiginiń resmı saıtyna silteme jasap.

Óńir ákimi Berdibek Saparbaevtyń tóraǵalyǵymen ótken apparat keńesinde jas mamandardy jumysqa ornalastyrý máseleleri jan-jaqty saralandy.

Ótken jyldan bastap oblystyq Ekonomıka jáne bıýdjettik josparlaý basqarmasy atalǵan baǵdarlamanyń úılestirýshisi bolyp tabylady. Basqarma basshysy Gúldana Jaýynbekovanyń aıtýynsha, 2010 - 2019 jyldar aralyǵynda 3603 jambyldyq baǵdarlama qatysýshysy atanǵan. Olar jalpy somasy 564,4 mln teńgeniń kóterme járdemaqysyn aldy. Onyń ishinde 1814 mamanǵa 5,2 mlrd teńgege jeńildetilgen nesıe berildi. Mamandardyń basym bóligi bilim berý salasynda jumysqa ornalasqan, olardyń sany – 1027, densaýlyq saqtaýda – 347, aýyl sharýashylyǵynda – 119, mádenıette – 51, sportta – 40, áleýmettik qamsyzdandyrý salasynda – 6 maman jumyspen qamtylǵan.

Sondaı-aq, aǵymdaǵy jyly 101 mamanǵa 27,7 mln teńge mólsherinde kóterme járdemaqy, 10 mamanǵa 38,4 mln teńgege turǵyn úı nesıesi berilgen. Jalpy bıyl «Dıplommen – aýylǵa» baǵdarlamasyn iske asyrý úshin 1 mıllıard teńgeden astam qarjy bólinip otyr.

Berdibek Saparbaev aýdan ákimdikterine joǵary oqý oryndarymen tyǵyz baılanysta jumys jasaýdy jáne óńirdegi mamandar jaǵdaıyna taldaý jasaýdy tapsyrdy.

«Jergilikti jerde taldaý jasap, qaı salaǵa, qandaı mamandar qajet ekenin anyqtańyzdar. Jyl saıyn suranystaǵy mamandyqtar boıynsha ýnıversıtetterdi qansha stýdent bitiretinin baqylap otyrý kerek. Bıylǵy oqý jyly da aıaqtalyp qaldy, al aýdan ákimderinde ondaı málimetter joq. Bárin az ýaqytta oryndaý kerek, sozylyp júretin ýaqyt joq. Men árdaıym barlyq salaǵa jas mamandardyń qajet ekenin aıtyp júremin. Aldaǵy ýaqytta olardyń bastamashyl qasıetteri kóptegen máselelerdi sheshýge yqpal etetin bolady. «Dıplommen – aýylǵa« baǵdarlamasynyń múmkindikterin paıdalana otyryp, olardy tıisti qajettiliktermen qamtamasyz ete alamyz», - dedi aımaq basshysy.

Sonymen qatar, ol aýdan ákimderine jas mamandarmen kezdesýler ótkizip, olardyń máseleleri men ótinishterin tyńdap, ony sheshý úshin jastarmen birlese jumys jasaýdy tapsyrdy.

«Biz tek jumyspen qamtý máselesin ǵana qarastyrmaýymyz kerek. Eger jastardy aýylda ustap qalǵymyz kelse, olar úshin mádenı demalystar uıymdastyryp, sporttyq ǵımarattarmen qamtýǵa tıispiz», - dedi Berdibek Saparbaev.