3,5 myńnan astam mektepte Internet jyldamdyǵyn arttyrýǵa tehnıkalyq múmkindik joq

ASTANA. QazAqparat – 3,5 myńnan astam mektepte Internet jyldamdyǵyn arttyrýǵa tehnıkalyq múmkindik joq. Bul týraly Úkimet otyrysynda Tsıfrlyq damý, ınnovatsııalar jáne aeroǵarysh ónerkásibi vıtse-mınıstri Ashat Orazbek aıtty, dep habarlaıdy QazAqparat tilshisi.

«6 414 mekteptiń 3 581-inde Internet jyldamdyǵyn arttyrýǵa tehnıkalyq múmkindik joq. Sondyqtan Internettiń qajetti jyldamdyǵyn jerseriktik tehnologııalardy qoldana otyryp qamtamasyz etý qajet. «Respýblıkalyq ǵaryshtyq baılanys ortalyǵy» aktsıonerlik qoǵamynyń aldyn ala esepteýlerine sáıkes, jyl saıyn 418,2 mln teńge talap etiledi. Sáıkesinshe, jerseriktik tehnologııalardy qoldanyp, 458 mektepti ınternetpen qamtamasyz etý josparlanýda», - dedi vıtse-mınıstr.

Ashat Orazbektiń dereginshe, qalǵan 3 123 mektepke talshyqty-optıkalyq baılanys jelilerin tartý «Qoljetimdi ınternet» ulttyq jobasy aıasynda júrgiziledi.

«Aýyldyq eldi mekenderge talshyqty-optıkalyq baılanys jelilerin tartý jobasy aýqymynda 2024-2027 jyldary aralyǵynda 190 mlrd teńge kózdeletin bolady», - dedi ol.