3,5 myńnan astam aýyl jańartylady - Prezıdent

NUR-SULTAN. QazAqparat - Jańa óńirlik standarttarǵa sáıkes 3,5 myńnan astam aýyl jańartylady. Bul týraly «Nur Otan» partııasynyń kezekten tys XX Sezinde QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Óńirlerdegi turmys sapasyn jaqsartý basty nazarymyzda bolady. Jańa óńirlik standarttarǵa sáıkes, 3,5 myńnan astam aýyl jańartylatyn bolady. Barlyq qalalar men aýyldar sýmen qamtamasyz etiledi. 246 eldi mekenge gaz tartylady. Mundaı eldi mekenderde 900 myń adam turady. Olardyń 350 myńnan astamy Nur-Sultan, Qaraǵandy, Jezqazǵan jáne Temirtaý qalalarynyń turǵyndary», - dedi Memleket basshysy.

QR Prezıdenti 53 tazalaý qondyrǵysyn ornatý jáne jańǵyrtý arqyly elimizdiń barlyq óńirindegi aýyz sýdy tazartýǵa múmkindik týatyndyǵyn aıtty. Bul osy saladaǵy túıtkildi máseleniń utymdy sheshimi bolmaq.

«Jol qurylysy qolǵa alynady. Ár aýylǵa deıingi barlyq joldar, ıaǵnı 27 myń shaqyrym jol jóndeýden ótkiziledi. Oblys ortalyqtary men respýblıkalyq mańyzy bar qalalar jyldamdyǵy joǵary 5G ınternetimen qamtamasyz etiledi. Sonymen qatar aýyldardyń 99 paıyzy osyndaı múmkindikke ıe bolady», - dedi Qasym-Jomart Toqaev.