29 naýryz. QazAqparat kúntizbesi
ATAÝLY KÚNDER
Qujattar erk indigi kúni (Derekter formaty nyń erkindigi kúni )
Jyl saıyn naýryzdyń sońǵy sársenbisinde Eýropa erkin baǵdarlamalyq qamtamasyz etý qorynyń bastamasymen atap ótiledi. Paıdalanýshylardyń formatqa jáne ázirleýshige silteme jasaýdan erkindigin qamtamasyz etýdegi ashyq formattardyń mańyzdylyǵyn kórsetý úshin 2008 jyly iske qosyldy. Ashyq formattardyń arqasynda memlekettik organdar, kompanııalar, uıymdar jáne qarapaıym paıdalanýshylar ózderi úshin eń yńǵaıly jáne qoljetimdi dep sanaıtyn baǵdarlamalarda faıldardy kedergisiz bólise alady jáne olarmen jumys isteı alady.
Fortepıano kúni
Ataýly kúnniń ıdeıasy nemis pıanısi Nıls Framǵa tıesili. Kúntizbelik jyldyń basynan bastap ár 88-shi kún atap ótiledi. Mundaı kúndi tańdaý kezdeısoq emes: qazirgi fortepıano dıapazony 7 1/3 oktavany quraıdy, ıaǵnı 88 perneden turady. Bul kúni fortepıanoda oınaıtyn oryndaýshylardy, kompozıtorlar men fortepıano mýzykasyn baǵalaıtyn jurtshylyqty quttyqtaý qalyptasqan.
ESTE QALAR OQIǴALAR
1996 jyly Pavlodar oblysynyń Baıanaýyl aýylynda Buqar jyraýǵa eskertkish ashyldy.
2006 jyly 1913-1918 jyldary ulttyń muńyn muńdap, joǵyn joqtaǵan «Qazaq» gazeti qaıta shyǵa bastady. HH ǵasyrdyń basynda ultymyzdyń azattyq rýhynyń kúmis qońyraýy bolyp, qazaqtyń kózi, qulaǵy, úni retinde til qatyp, táýelsizdik ıdeıasyn el arasynda pármendilikpen nasıhattaǵan «Qazaq» gazeti Alashtyń uldary Álıhan, Ahmet, Mirjaqyptardyń isterin jalǵastyrýdy maqsat tutqan.
2012 jyly Ýkraınadan biregeı qujat alyndy – onda Slıvýta qalasy mańyndaǵy «Grosslazaret» nemis lageriniń qabyrǵasynda qaza tapqan qazaqstandyq jaýyngerler tizimi boldy. Olardyń barlyǵy resmı túrde iz-túzsiz joǵalǵandar bolyp eseptelinip kelgen edi.
2013 jyly Almatyda Asfendııarov atyndaǵy Qazaq ulttyq medıtsına ýnıversıtetiniń professorlyq klınıkasynda elimizdegi alǵashqy Dıabet ortalyǵy jáne onda qurylǵan mektep ashyldy.
2014 jyly Almatyda Abaı atyndaǵy Memlekettik akademııalyq opera jáne balet teatrynda qazaqtyń tuńǵysh komedııalyq «Aısulý» operasy qoıyldy. Operany alǵash 1964 jyly Almatyda rejısser Qaýken Kenjetaev qoıǵan bolatyn. Serke rólin Ermek Serkebaev, al Aısulý rólin Roza Jamanova somdaǵan.
2014 jyly Helsınkıdegi Fınlıandııa Ulttyq arhıviniń bas dırektory ıÝssı Nýorteva QR Mádenıet mınıstrliginiń ókiline jarııa etilgen derekterdi tapsyrdy. Onda 1941-1945 jyldary Fınlıandııa aýmaǵynda bolǵan 27 qazaqstandyq áskerı tutqynnyń tirkeý kartochkalary túrindegi qupııasyz etilgen málimetter qamtylǵan.
2016 jyly Qazaqstannyń Túrkııadaǵy elshiligi TÚRKSOI uıymymen yntymaqtastyqta «Hüzün Kuşağı» (Uly dala áńgimeleri) degen atpen túrik tilinde qazaqstandyq 25 avtordyń shyǵarmalar jınaǵyn baspadan shyǵardy.
2017 jyly Baký memlekettik ýnıversıtetinde qazaqtyń uly aqyny, fılosof, jazýshy Abaıdyń ázerbaıjan tilindegi shyǵarmalar jınaǵy tanystyryldy. Oǵan Abaıdyń ázerbaıjan tiline buryn aýdarylǵan 3 poemasy men 68 óleńi, sondaı-aq jańadan aýdarylǵan «Qara sózderi» engizildi.
2017 jyly ánshi Dımash Qudaıbergenniń fotosy Nıý-Iork qalasynyń Manhetten aýdanynda ornalasqan Taım Skver alańyndaǵy úlken LED ekranǵa shyqty. 101 FM radıosy tanymal juldyzdar arasynda osy qurmetke ıe bolý úshin báıge jarııalaǵan bolatyn.
2017 jyly Qazaqstan Mılanda ótken Afrıka, Azııa jáne Latyn Amerıkasy fılmderiniń festıvaline alǵash ret qatysyp, ıtalııalyq uly saıahatshy týraly «Marko Polonyń Jibek joly» atty ǵylymı-kópshilik fılmdi usyndy. Jıhankez óziniń Azııaǵa saıahatynyń tarıhyn áıgili «Álemniń ártúrliligi týraly kitapta» sıpattady. Fılm kınofestıvaldiń arnaıy júldesine ıe boldy.
2021 jyly Qazaqstanda alǵash ret «Qazaqstannyń eńbek sińirgen ustazy» memlekettik nagradasy taǵaıyndaldy. Qazaqstan Respýblıkasy Prezıdentiniń jarlyǵymen elimizdiń barlyq aımaqtarynan 20-dan astam eńbek sińirgen ustazdar memlekettik syılyqtyń alǵashqy ıegerleri atandy. «Qazaqstannyń eńbek sińirgen ustazy» qurmetti ataǵy ustazdarǵa erekshe jetistikteri men memleket aldyndaǵy erekshe qyzmetteri úshin beriledi.
2022 jylyJezqazǵan tarıhı-arheologııalyq murajaıyna ánshi, kompozıtor jáne QR eńbek sińirgen mádenıet qyzmetkeri Jaqsygeldi Seıilovtiń jeke zattary tapsyryldy. 25 jyl boıy jeke kollektsııalarynda saqtalǵan Jaqsygeldi Seıilovtyń baıanyn, 42 jyl boıy otbasynyń jádigeri sanalǵan dıplomatyn Astanadan, Qaraǵandydan kelgen qonaqtar Mádı Artyǵalıev pen Álı Toıjigit mýzeıge tabys etti.
2022 jyly DAZN strımıngtik servısi óziniń tvıtterinde Azııadaǵy eń tanymal boksshylardyń bestigin usyndy. Qazaqstannan TOP-5-ke Gennadıı Golovkın kirdi.
2022 jyly Naýryz meıramyn toılaý aıasynda Brıýssel men Lıýksembýrgte saltanatty is-sharalar ótti. Onda zamanaýı qazaq mádenıeti, ulttyq zergerlik buıymdar men qazaq shyǵarmashylyq toptarynyń ónimi usynyldy. Tanymal Muse of Nomad jýrnalynyń birinshi sany qazirgi Qazaqstan halqynyń dástúri, ómir salty, mádenıetine jáne qazaqtyń sán álemine arnaldy.