29 maýsym. Tulǵalar týǵan kún

<p>Búgin, 29 maýsym kúni tulǵalardan kimder dúnıege kelgen? Kazinform oqyrmandaryna esimder kúntizbesin usynady.</p>

ESІMDER

66 jyl buryn (1958) jýrnalıst, jazýshy, TMD jýrnalıster konfederatsııasy syılyǵynyń laýreaty, QR Prezıdenti grantynyń ıegeri, Qazaqstannyń eńbek sińirgen qaıratkeri Qaınar Qalıaqparuly OLJAI dúnıege keldi.

Shyǵys Qazaqstan oblysy Tarbaǵataı aýdanynda týǵan. Qazaq memlekettik ýnıversıtetiniń (qazirgi ál Farabı atyndaǵy Qazaq Ulttyq ýnıversıteti) jýrnalıstıka fakýltetin bitirgen.

Eńbek jolyn «Lenınshil jas» (qazirgi «Jas alash») gazetinde korrektor, tilshi, aǵa tilshi, Ortalyq Qazaqstan boıynsha arnaýly tilshi bolyp bastaǵan. Keıinnen «Sotsıalıstik Qazaqstan» gazetinde (qazirgi «Egemen Qazaqstan») bólism basshysy, «Atamura» gazeti redaktorynyń orynbasary, «Birlik» gazetiniń bas redaktory, «Túrkistan» gazeti bas redaktorynyń orynbasary (1993-1997); «Habar-2» telearnasynda kommentator, jańalyqtar bólimi dırektsııasy basshysynyń orynbasary, «Habar» agenttigi» AQ bas prodıýseri boldy. 2006 jyldan beri «Qazaqstan» RTRK AQ Bas prodıýseri, Basqarma Tóraǵasynyń shyǵarmashylyq jónindegi orynbasary, «Qazaqstan» Ulttyq arnasynyń bas dırektory qyzmetterin atqardy.

«Myń bir maqal», «Degen eken», «Solaı bolǵan», «Til», «Sózmergen», «Іlik septigi», «Kelbet» t.b. baǵdarlamalardyń, 15 serııaly tarıhı-derekti «Birinshi» telefılminiń avtory. 1994 jyly «Prezıdent pyraǵy», 2007 jyly «Qara nary qazaqtyń», 2008 jyly «Atamyz Alasanbaı», 2010 jyly «Qanat baılaǵan qazaq» kitaptary jaryqqa shyqty.

52 jyl buryn (1972) Qazaqstan Respýblıkasy Ulttyq ulan akademııasynyń bastyǵy Artýr Qalıaqparuly TOQYShEV dúnıege keldi.

Sankt-Peterbýrgte (RF) týǵan. KSRO ІІM Komsomoldyń 60 jyldyǵy atyndaǵy Joǵary saıası ýchılışesin pedagogıka jáne tárbıe jumysynyń ádistemesi mamandyǵy boıynsha bitirgen (1993); Qazaqstan Respýblıkasy Qarýly Kúshteriniń Áskerı akademııasy, mamandyǵy – komandalyq-shtabtyq jedel-taktıkalyq (2001).

Eńbek joly: patrýldik rota komandıriniń orynbasary - shtab bastyǵy - áskerı bólim komandıriniń orynbasary (1993-2003); 5513, 7552, 6654 áskerı bólimderiniń komandıri (2003-2012); Ulttyq qorǵanys ýnıversıtetiniń «Jedel óner jáne taktıka» kafedrasynyń aǵa oqytýshysy (2012-2013); Qazaqstan Respýblıkasy Іshki ister mınıstrligi Іshki áskerler Bas qolbasshylyǵy Bas shtaby Bas jedel basqarmasy bastyǵynyń orynbasary (2013-2014); Ulttyq ulan Joǵarǵy qolbasshylyǵy Bas shtaby bastyǵynyń birinshi orynbasary (2014-2020).

2022 jyldyń tamyz aıynan bastap qazirgi qyzmetinde.

45 jyl buryn (1979) «Allur Group» kompanııalar toby» AQ dırektorlar keńesiniń tóraǵasy Andreı Sergeevıch LAVRENTЬEV dúnıege keldi.

Almaty qalasynda týǵan. Almaty qalasyndaǵy «Ádilet» joǵary zań mektebin «quqyqtaný» mamandyǵy boıynsha bitirgen.

Jumys orny: AllurAuto kompanııasynyń quryltaıshylarynyń biri jáne aktsıoneri (2003); «Allur» kompanııalar toby» AQ Dırektorlar keńesiniń tóraǵasy (2015); «AgromashHoldıng KZ» AQ dırektorlar keńesiniń tóraǵasy (2017).

2023 jyldyń jeltoqsan aıynan beri qazirgi qyzmetinde.

38 jyl buryn (1986) qazaq opera ánshisi (barıton), Qazaqstan Respýblıkasynyń eńbek sińirgen qaıratkeri Azamat Qaıratuly JYLTYRGÓZOV dúnıege keldi.

Taldyqorǵan qalasynda týǵan. Qazaq ulttyq mýzyka akademııasyn bitirgen (2009 j.), Opera ánshisi, kontsert oryndaýshysy.

Eńbek joly: 2006 jyldan bastap Astana qalasynyń Memlekettik fılarmonııasynyń solısti; 2007 jyldan bastap K. Baıseıitova atyndaǵy Ulttyq opera jáne balet teatrynyń opera ánshisi; Qazaq ulttyq óner ýnıversıtetiniń «Vokal óneri jáne hor dırıjerleý» kafedrasynyń meńgerýshisi.

Operalyq rólderi (partııalar): Onegın (P.I. Chaıkovskıı, Evgenıı Onegın), Roberto (P.I. Chaıkovskıı, «Iolanta»), Geront (G. Verdı, «Levı Traviata»). Ol Reseı, Belarýs, Qytaı, Japonııa, Polsha, Ońtústik Koreıa, Saýd Arabııasy, Birikken Arab Ámirlikteri, Iordanııa, Shveıtsarııa, Avstrııa, AQSh, Mońǵolııa elderiniń kontsertterimen gastroldik saparlarǵa shyqty. «Shabyt» IX Halyqaralyq baıqaýynyń 1-oryn ıegeri (Astana, 2006 j.), «Jas talanttar» HHІІІ Halyqaralyq baıqaýynyń 1 oryn ıegeri (San-Bartolomeo, 2008), VII Halyqaralyq oryndaýshylar baıqaýynyń 2-shi oryn júldegeri, N. Sábıtov atyndaǵy VI halyqaralyq vokalıster baıqaýynyń 4-shi oryn júldegeri (Ýfa, 2008). TMD-ǵa múshe memleketterdiń IV halyqaralyq Delfıı oıyndarynyń altyn medal ıegeri (Astana, 2006), S. Monıýshko atyndaǵy VI Halyqaralyq vokalıster baıqaýynyń arnaıy júldesin (Varshava, 2007 j.) alǵan.