281 adamnyń test nátıjesi joıyldy: Magıstratýraǵa túsýge emtıhan aıaqtaldy

ASTANA. QazAqparat – Ǵylym jáne joǵary bilim mınıstrligi magıstratýraǵa túsý úshin ótkizilgen keshendi testileýdiń nátıjelerin jarııalady, dep habarlaıdy QazAqparat.

Keshendi testileýdi 40 myń adam tapsyrǵan. Olardyń 41% shekti ball jınady. Ortasha kórsetkish – 70 ball. Eń joǵary ball – 136.

Alaıda, 281 qatysýshynyń nátıjesi joıylǵan. Onyń ishinde 189 adam smartfon, shpargalka jáne basqa da tyıym salynǵan zattardy aýdıtorııaǵa alyp ótýge tyrysqany úshin test tapsyrý múmkindiginen aıyryldy. Sondaı-aq 89 adam test tapsyrý kezinde erejelerdi buzǵany úshin aýdıtorııadan shyǵarylyp, olardyń nátıjeleri joıylǵan. Taǵy 1 adamnyń baly vıdeojazbalar qaıta qaralǵannan keıin joıyldy.

Budan bólek, bireýdiń ornyna test tapsyrýǵa kirmek bolǵan 2 adam áshkerelendi.

Keshendi testileý 3 bloktan turady: shet tili boıynsha test, oqýǵa daıyndyǵyn anyqtaýǵa arnalǵan test jáne bilim berý baǵdarlamalary tobynyń beıini boıynsha test.

«143 bilim berý baǵdarlamalary toby boıynsha respýblıkalyq apellıatsııalyq komıssııaǵa 15 myńnan astam ótinish tústi, onyń ishinde mazmuny boıynsha – 14 myń, tehnıkalyq sebepterge baılanysty – 1,4 myń.

Apellıatsııalyq komıssııanyń sheshimimen 181 biregeı test tapsyrmasy qanaǵattandyryldy: mazmuny boıynsha – 146, tehnıkalyq sebepterge baılanysty – 35 tapsyrma», - delingen málimette.

Aıta keteıik, bıyl shekti baldar ózgerissiz qaldy: ǵylymı-pedagogıka baǵyty boıynsha magıstratýraǵa túsý úshin 75 ball, beıindik baǵyt boıynsha 50 ball jınaý qajet.

Magıstratýrada oqýǵa 13 myńnan astam grant bólindi. Grant konkýrsyna qujattar qabyldaý erteń, 11 tamyzda bastalady.