28 shildede Qytaıda HHHІ Dúnıejúzilik jazǵy ýnıversıada bastalady

BEIJІŃ. QazAqparat – 28 shildede Qytaıdyń ońtústik-batysyndaǵy Sychýan provıntsııasynyń Chendý qalasynda 31-shi Dúnıejúzilik jazǵy ýnıversıada bastalady. Sporttyq shara 8 tamyzǵa deıin jalǵasady, dep habarlaıdy QazAqparat menshikti tilshisi.

Chendýdegi ýnıversıada 2021 jyly ótýi kerek edi, biraq COVID-19 pandemııasyna baılanysty bir jylǵa shegerildi. Pandemııa saldarynan 2022 jyly da uıymdastyrylmady. 2022 jyldyń maýsym aıynda Halyqaralyq stýdenttik sport federatsııasynyń (FISU) atqarýshy komıteti jarystyń jańa datasyn belgiledi – 2023 jyldyń 28 shildesi men 8 tamyzy aralyǵy. Ýnıversıada 2023 jyly ótetinine qaramastan, bastapqy «Chendý 2021» ataýy saqtalady. Chendý-2021 oıyndarynda dúnıejúzi ýnıversıtetteriniń stýdentteri sporttyń 18 túrinen 269 medal jıyntyǵy úshin synǵa túsedi. Uıymdastyrý komıtetiniń ókilderi Ýnıversıadaǵa jumyldyrylatyn 49 stadıon eki jyl buryn paıdalanýǵa berilgenin aıtty. Bıyl sport nysandaryn qabyldaý jáne synaqtan ótkizý jumystary júrgizildi, olardyń barlyǵy standartqa saı jáne halyqaralyq jarystardy ótkizýge jaramdy. Sporttyq sharaǵa 20 myńnan astam volonter tartylǵan.

Qazaqstannyń 90 sportshydan turatyn stýdenttik komandasy sporttyń 10 túrine qatysady: sadaq atý, gımnastıka, jeńil atletıka, semserlesý, dzıýdo, júzý, ústel tennısi, taekvondo, oq atý jáne ýshý.

Chendýdegi jazǵy ýnıversıadanyń ashylý saltanatyna QHR tóraǵasy Sı Tszınpın qatysatyny kútiledi. Qytaı osymen úshinshi ret Dúnıejúzilik jazǵy Ýnıversıadany ótkizgeli otyr. Buǵan deıingi oıyndar 2001 jyly Beıjińde jáne 2011 jyly Shenchjende ótken edi.

Buǵan deıin habarlaǵanymyzdaı, Dúnıejúzilik jazǵy Ýnıversıadanyń ashylý saltanatynda Qazaqstan týyn dzıýdoshy Qablan Nursultan kóterip shyǵady.