28 panfılovshylardyń Máskeý túbindegi erligi bolǵan-bolmaǵanyn arnaıy komıssııa tekseretin boldy

ASTANA. QazAqparat - 28 panfılovshylardyń Máskeý túbindegi erligi «ańyz» ba, joq pa, endi ony arnaıy komıssııa tekseretin bolady. Bul týraly búgin Ortalyq kommýnıkatsııalar qyzmetinde ótken baspasóz máslıhatynda QR Premer-Mınıstrdiń orynbasary Berdibek Saparbaev málim etti.

«28 panfılovshylarǵa qatysty aıtatyn bolsaq, biz bul máseleni taldaımyz. Kerek bolsa, arnaıy vedomstvoaralyq komıssııa quramyz», - dedi B.Saparbaev tilshilerdiń qoıǵan saýalyna.

Óz kezeginde QR Bilim jáne ǵylym mınıstri Aslan Sárinjipov bul másele tek bilim salasyna qatysty emes, tarıhqa da baılanysty ekenin aıtty.

«Bul tek bilim berýdi máselesi emes, sonymen qatar tarıhtyń enshisindegi dúnıe bolyp otyr. Sondaı-aq, zańdyq aspektiler de joq emes. Menińshe, bul suraqty tıisti organdarmen jáne QR Mádenıet jáne sport mınıstrligimen birge qarastyratyn bolamyz», - deıdi mınıstr. Esterińizde bolsa, búginde Qazaqstanda jáne Reseıde 28 panfılovshylardyń Máskeý túbindegi erligine kúmán keltirý beleń alyp ketti.