28 naýryz. Tulǵalar týǵan kún

ASTANA. QazAqparat - Búgin, 28 naýryzda tulǵalardan kimder dúnıege kelgen? QazAqparat oqyrmandaryna esimder kúntizbesin usynady.

ESІMDER

143 jyl buryn (1880-1924) halyq aqyny, ánshi-kompozıtor, Qaz daýysty Qazybek bıdiń urpaǵy Mádı BÁPIULY dúnıege kelgen.

Qaraǵandy oblysynda týǵan. Aqan seri, Birjan sal, Balýan Sholaq, Úkili Ybyraı sııaqty sańlaqtarmen kezdesip, ónege alǵan. Jala jabylyp, abaqtyǵa túsken. Túrmede elin, jerin saǵynyp, ádiletsiz zamanǵa nalyǵan Mádı «Qarakesek» ánin shyǵardy. Budan basqa onyń «Úshqara», «Shirkin-aı», «Mádı» atty ánderi bar. Olardyń deni keıin «Qarakesek», «Er Tarǵyn», «Qyz Jibek» qazaq operalarynda paıdalanyldy. Mádı 1916 jyly azattyq jolyndaǵy halyq kóterilisine ún qosty. Patshanyń jergilikti ákimderiniń ozbyrlyǵyn áshkereleıtin jyrlar tolǵady. Mádıdiń án mátinderinen basqa óleńderi áli de jınaqtalmaǵan. Onyń shyǵarmalary týraly Ahmet Jubanov zertteý eńbekterinde, Áljappar Ábishev «Naızaǵaı», Áıip Bektasov «Mádı» atty kitaptarynda jazdy.

63 jyl buryn (1960) Qazaqstan Respýblıkasynyń memleket jáne qoǵam qaıratkeri, Qazaqstannyń Eńbek Eri Abzal Jumashuly ERALIEV dúnıege keldi.

Qyzylorda oblysynda týǵan. Jambyl gıdromelıoratıvtik qurylys ınstıtýtynyń Qyzylorda qalasyndaǵy fılıalyn ınjener-qurylysshy mamandyǵy boıynsha bitirgen (1982). Eńbek joly: 1984 - 1994 jyldary Qyzylorda úı qurylys kombınatynda qurylys sheberi, prorab, montajdaý ýchaskesiniń bastyǵy bolyp jumys jasaǵan. 1994 jyldan bastap 2016 jyldyń naýryz aıyna deıin - kúrish ósirýmen aınalysatyn jáne ony óńdeıtin «Abzal jáne Kompanııa» tolyq seriktestiginiń dırektory. 2008 jyldan bastap qoǵamdyq negizde Oblystyq kúrish óndirýshiler jáne óńdeýshiler qaýymdastyǵynyń prezıdenti bolyp saılandy. 2011 jyldan bastap - «Nur Otan» partııasynyń múshesi. 2012 jyldyń qańtarynan bastap 2016 jyldyń naýryz aıyna deıin Qyzylorda oblystyq maslıhatynyń depýtaty boldy. QR Parlament Májilisiniń VI shaqyrylym depýtaty, Agrarlyq máseleler komıtetiniń múshesi (2016-2021). 2013 jyly Qazaqstan Respýblıkasy Prezıdentiniń Jarlyǵymen elge jasaǵan eren eńbegi úshin «Qazaqstannyń Eńbek Eri» ataǵy men «Altyn juldyz» berildi. «Qyzylorda oblysynyń qurmetti azamaty», «Qyzylorda oblysy Syrdarııa aýdanynyń qurmetti azamaty» ataqtarynyń ıegeri. «Otan», «Qurmet» ordenderimen, «Qazaqstan Konstıtýtsııasyna 10 jyl», «Qazaqstan Respýblıkasynyń táýelsizdigine 20 jyl», «Qazaqstan Konstıtýtsııasyna 20 jyl» merekelik medaldarymen marapattalǵan.