28 naýryz. Tulǵalar týǵan kún
ESІMDER
64 jyl buryn (1960) Qyzylorda oblysy ústel tennısi federatsııasynyń tóraǵasy, Qazaqstan Respýblıkasynyń memleket jáne qoǵam qaıratkeri, Qazaqstannyń Eńbek Eri Abzal Jumashuly ERALIEV dúnıege keldi.
Qyzylorda oblysynda týǵan. 1982 jyly Jambyl gıdromelıoratıvtik qurylys ınstıtýtynyń Qyzylorda qalasyndaǵy fılıalyn ınjener-qurylysshy mamandyǵy boıynsha bitirgen.
Eńbek joly: 1984-1994 jyldary Qyzylorda úı qurylys kombınatynda qurylys sheberi, prorab, montajdaý ýchaskesiniń bastyǵy bolyp jumys jasaǵan. 1994-2016 jyldary kúrish ósirýmen aınalysatyn jáne ony óńdeıtin «Abzal jáne Kompanııa» tolyq seriktestiginiń dırektory boldy. 2008 jyldan bastap qoǵamdyq negizde Oblystyq kúrish óndirýshiler jáne óńdeýshiler qaýymdastyǵynyń prezıdenti bolyp saılandy. 2011 jyldan bastap - «Nur Otan» partııasynyń múshesi. 2012-2016 jyldary Qyzylorda oblystyq maslıhatynyń depýtaty boldy. 2016-2021 jyldary QR Parlament Májilisiniń VI shaqyrylym depýtaty, Agrarlyq máseleler komıtetiniń múshesi bolyp qyzmet atqarǵan.
2013 jyly QR Prezıdentiniń Jarlyǵymen elge jasaǵan eren eńbegi úshin «Qazaqstannyń Eńbek Eri» ataǵy men «Altyn juldyz» berildi. «Qyzylorda oblysynyń qurmetti azamaty», «Qyzylorda oblysy Syrdarııa aýdanynyń qurmetti azamaty» ataqtarynyń ıegeri.
«Otan», «Qurmet» ordenderimen, «Qazaqstan Konstıtýtsııasyna 10 jyl», «Qazaqstan Respýblıkasynyń táýelsizdigine 20 jyl», «Qazaqstan Konstıtýtsııasyna 20 jyl» merekelik medaldarymen marapattalǵan.
68 jyl buryn (1956) Qazaqstan Respýblıkasy Joǵarǵy sotynyń ardageri Núrııa Qurmanqyzy SYNǴALIEVA dúnıege keldi.
Astrahan oblysynyń Ahtýbınsk qalasynda týǵan. 1981 jyly S.Kırov atyndaǵy Qazaq memlekettik ýnıversıtetiniń zań fakýltetin «quqyqtanýshy» mamandyǵy boıynsha bitirgen.
Eńbek joly: 1973-1974 jyldary RKFSR Astrahan oblysy Ahtýbınsk qalasyndaǵy konservileý zaýytynyń jumysshysy boldy. 1974-1978 jyldary Qazan Tóńkerisiniń 50 jyldyǵy atyndaǵy Almaty maqta-mata kombınatynda jún tútý mashınalarynyń operatory boldy. 1978-1979 jyldary QazKSR Joǵarǵy sotynyń mashınısi. 1979-1981 jyldary QazKSR Joǵarǵy sotynyń hatshy-stenografısi, 1981-1983 jyldary QazKSR Joǵarǵy soty shaǵymdar bóliminiń konsýltanty, 1983-1986 jyldary QazKSR Joǵarǵy sotynyń qylmystyq ister jónindegi sot alqasynyń konsýltanty, 1986-1988 jyldary QazKSR Joǵarǵy soty 2-shi bóliminiń bastyǵy bolyp qyzmet atqarǵan. 1988-1993 jyldary QazKSR, QR Joǵarǵy sotynyń keńes zańnamasyn júıelendirý jáne násıhattaý bóliminiń aǵa konsýltanty, 1993-1995 jyldary QR Joǵarǵy sotynyń raqymshylyq jasaý týraly qoldaýhattardy qarastyrý bóliminiń bastyǵy, QR Joǵarǵy sotynyts qylmystyq ister jónindegi sot alqasynyń bas konsýltanty, 1995-2014 jyldary QR Joǵarǵy sotynyń sýdıasy bolyp qyzmet atqardy.
«Qazaqstan Konstıtýtsııasyna 10 jyl» (2005), «Astananyń 10 jyldyǵy» (2008) mereıtoı medaldarymen marapattalǵan.
67 jyl buryn (1957) medıtsına ǵylymdarynyń doktory, professor Marat Shádibaıuly ABDOLLAEV dúnıege keldi.
Qyzylorda qalasynda týǵan. 1980 jyly Almaty memlekettik medıtsına ınstıtýtyn, 1987 jyly Máskeý qalasyndaǵy Proktologııa ǵylymı-zertteý ınstıtýtynyń aspırantýrasyn bitirgen.
Eńbek joly: 1980-1983 jyldary Qyzylorda oblystyq aýrýhanasynda ıntern, hırýrg dárigeri, 1983-1985 jyldary Almaty qalasyndaǵy №1-klınıkalyq aýrýhanasynda hırýrg, 1987-1989 jyldary Qazaq onkologııa jáne radıologııa ǵylymı-zertteý ınstıtýtynda aǵa laborant, 1989-2005 jyldary Almaty qalasynyń ortalyq klınıkalyq aýrýhanasynda proktologııa bóliminiń meńgerýshisi bolyp qyzmet atqardy. 2005-2007 jyldary Qyzylorda oblystyq densaýlyq saqtaý departamentiniń dırektory qyzmetinde boldy. 2007-2008 jyldary Almaty dárigerler biliktiligin jetildirý ınstıtýtynda koloproktologııa kýrsynyń meńgerýshisi, 2008-2011 jyldary Almaty dárigerler biliktiligin jetildirý ınstıtýtynda ambýlatorııalyq hırýrgııa jáne koloproktologııa kafedrasynyń meńgerýshisi, Almaty memlekettik dárigerlerdiń biliktiligin arttyrý ınstıtýtynyń koloproktologııa kýrsynyń professory qyzmetin atqarǵan. 2012-2017 jyldary Almaty qalasy Densaýlyq saqtaý basqarmasynyń Ortalyq klınıkalyq aýrýhanasy janyndaǵy memlekettik qazynalyq kásipornynyń dırektory, 2017-2019 jyldary Almaty qalasyndaǵy «№7 qalalyq klınıkalyq aýrýhana» RMK janyndaǵy MKQK dırektory, 2019-2020 jyldary Almaty qalasy Ortalyq qalalyq klınıkalyq aýrýhanasynyń koloproktologııa ortalyǵynyń dırektory, 2020 jyly Almaty qalasynyń Ortalyq qalalyq klınıkalyq aýrýhanasynyń meńgerýshisi boldy.
1998 jyldan bastap Qazaqstan proktolog-dárigerler qaýymdastyǵynyń prezıdenti.
«Qurmet» ordenimen marapattalǵan.
144 jyl buryn (1880-1924) halyq aqyny, ánshi-kompozıtor, Qaz daýysty Qazybek bıdiń urpaǵy Mádı BÁPIULY dúnıege kelgen.
Qaraǵandy oblysynda týǵan.
Aqan seri, Birjan sal, Balýan Sholaq, Úkili Ybyraı sııaqty sańlaqtarmen kezdesip, ónege alǵan. Jala jabylyp, abaqtyǵa túsken. Túrmede elin, jerin saǵynyp, ádiletsiz zamanǵa nalyǵan Mádı «Qarakesek» ánin shyǵardy. Budan basqa onyń «Úshqara», «Shirkin-aı», «Mádı» atty ánderi bar. Olardyń deni keıin «Qarakesek», «Er Tarǵyn», «Qyz Jibek» qazaq operalarynda paıdalanyldy. Mádı 1916 jyly azattyq jolyndaǵy halyq kóterilisine ún qosty. Patshanyń jergilikti ákimderiniń ozbyrlyǵyn áshkereleıtin jyrlar tolǵady. Mádıdiń án mátinderinen basqa óleńderi áli de jınaqtalmaǵan. Onyń shyǵarmalary týraly Ahmet Jubanov zertteý eńbekterinde, Áljappar Ábishev «Naızaǵaı», Áıip Bektasov «Mádı» atty kitaptarynda jazdy.