28 maýsym. Jylnama
ATAÝLY KÚNDER
Buqaralyq aqparat quraldary qyzmetkerleri kúni
Áýelde Táýelsiz Qazaqstanda jýrnalıstıka kúni 10 mamyrda atalyp ótetin. Sebebi, 1870 jyly dál osy kúni qazaq tilindegi alǵashqy basylym – «Túrkistan ýálaıaty» gazetiniń alǵashqy sany jaryq kórgen bolatyn.
1997 jyly Baspa, televıdenıe jáne radıo kúni bekitilip, ol maýsym aıynyń sońǵy jeksenbisinde atalyp ótetin boldy.
2011 jyldyń qazanynda Prezıdent Nursultan Nazarbaev elimizdegi kásibı jáne basqa da merekeler tiziminiń jańa redaktsııasyn maquldady. Oǵan sáıkes, kásibı mereke Baılanys jáne aqparat quraldary qyzmetkerleri kúni bolyp ózgertildi.
Prezıdent Qasym-Jomart Toqaevtyń tapsyrmasymen jáne QR Úkimetiniń 2019 jyldyń 25 maýsymyndaǵy Qaýlysymen elimizdegi merekelik kúnderdiń tizbesine ózgeris engizildi. Oǵan sáıkes, jýrnalıster kásibı meıramyn 28 maýsym kúni toılaıtyn boldy jáne ol Buqaralyq aqparat quraldary qyzmetkerleri kúni dep atalady. Al, Baılanys jəne aqparattandyrý qyzmetkerleri kúni 17 mamyrǵa aýystyryldy.
ESTE QALAR OQIǴALAR
1934 jyly Soltústik Qazaqstan oblystyq memlekettik tuqymdyq ınspektsııasy quryldy.
1995 jyly QR Prezıdentiniń «Munaı týraly» Zań kúshi bar Jarlyǵy shyqty.
2002 jyly QR Prezıdentiniń Shyǵys Qazaqstan oblysyndaǵy Lenınogor qalasynyń ataýyn Rıdder dep ózgertý týraly Jarlyǵy shyqty.
2011 jyly Astanada Islam yntymaqtastyǵy uıymy (IYU) Syrtqy ister mınıstrleri keńesiniń 38-sessııasy ótti. Sol sátten bastap Qazaqstan osy halyqaralyq uıymǵa tóraǵalyq etýge kiristi. Bul basqosýdy tarıhı oqıǵa dep ataýǵa bolady, óıtkeni onda Islam konferentsııasy uıymynyń ataýyn (IKU) Islam yntymaqtastyǵy uıymy (IYU) dep ózgertý týraly sheshim qabyldandy. Adam quqyqtary jónindegi turaqty komıssııa quryldy. Alǵash ret IYU-nyń Ortalyq Azııamen yntymaqtastyq jónindegi is-áreket jospary qabyldandy.
2014 jyly Brıýsselde Dúnıejúzilik keden uıymy (DKU) Keden yntymaqtastyǵy keńesiniń 123-124 sessııalary barysynda Qazaqstan DKU-nyń Qarjy komıtetine saılandy.
2014 jyly Almatyda belgili rok-mýzykant Vıktor Tsoıdy eske alý qabyrǵasy paıda boldy. Onyń avtory – jas sýretshi Pavel Kas. Ol «Kıno» tobynyń lıderiniń beınesin Arbattaǵy arkalardyń birine keskindedi. Dál osy jerde buǵan deıin Vıktor Tsoıdyń ónerin súıetin jastar jınalatyn, biraq keıinnen ol jerge dúkender salyndy. Pavel jergilikti PIK-ke usynys jasap, qabyrǵany mádenı orynǵa aınaldyrdy. Bir ereksheligi, Pavel salǵan sýrette Tsoı qolyna gıtara ne mıkrofon emes, shaı quıylǵan shynyaıaq ustap tur.
2015 jyly Oralda Qazaqstannyń halyq jazýshysy Qadyr Myrza Álıge eskertkish ornatyldy. Sondaı-aq, uly aqynnyń atymen atalatyn jańa mádenıet jáne óner ortalyǵy ashyldy.
2017 jyly Baılanys jáne aqparat qyzmetkerleri kúninde elimizdiń tanymal medıabasshylary men jýrnalıster toby «Qazaqstan Medıaodaǵy» qoǵamdyq uıymyn qurǵanyn jarııalady.
28 maýsym – jýrnalıster ózderiniń kásibı merekelerin atap ótetin kúni odaq basshylarynyń birinshi jalpy jınalysy bolyp ótti.
«QazAqparat» HAA Bas dırektory Asqar Ýmarov, Armanjan Baıtasov, Erlan Bekhojın, Erlan Qarın, Shámshıdın Páteev, Nurtóre Júsip, Nurjan Muhamedjanova, Batyr Qazybaev, Dana Ormanbaeva, Aıdar Jumabaev, Vıktor Kııanıtsa, Mıhaıl Dorofeev, Arman Shoraev jáne Beıbit Álibekov odaqtyń quryltaıshylary boldy.
2017 jyly astanalyq Gúlmıra Smaılova Ispanııada ótken HHІ Dúnıejúzilik jazǵy transplant-oıyndarda 1-oryndy ıelendi. Ol júregi almastyrylǵan qazaqstandyq sportshy áıelder arasyndaǵy boýlıng jarysyna qatysyp, Qazaqstan quramasyna alǵash ret altyn medal syılady.
2017 jyly kúlli álemge áıgili Rock the Ballet ujymy Eurasian Dance Festival halyqaralyq balet óneri festıvalinde tuńǵysh ret «Astana balet» teatrynyń sahnasynda óner kórsetti. Trýppanyń negizin qalaýshy – álemniń eń jas horeograftarynyń biri Rasta Tomas. Trýppanyń stıli balet, djaz, rok-balet, breık jáne hıp-hop bılerin qamtıdy.
2018 jyly Gaagadaǵy áıgili Crowne Plaza Den Haag Promenade kórmeler zalynda «Undiscovered Kazakhstan» («Tańǵajaıyp Qazaqstan») jáne «Astana – Uly dala marjany» kórmeleri ashyldy. Undiscovered Kazakhstan kórmesindegi biregeı sýretter Gaaga turǵyndaryna bizdiń elge jańa kózben qarap, Qazaqstan tabıǵatynyń sulýlyǵyn baǵalaý múmkindigin berdi. Kórmege 3 myńnan astam fotosýret qoıyldy.
2018 jyly elordada ata-ana qamqorlyǵynsyz qalǵan balalar shyǵarmashylyǵyna arnalǵan «Búginniń balasy – bolashaqtyń danasy» atty І respýblıkalyq festıval ótti. Festıvalge Nur-Sultan qalasyndaǵy jáne Qazaqstannyń basqa óńirlerindegi balalar úılerinen 7-18 jas aralyǵyndaǵy 300-den astam tárbıelenýshi qatysty. Balalar eki kún boıy «Estradalyq vokal», «Zamanaýı ulttyq kıim dızaıny», «Kórkemsóz», «Halyqtyq óner», «Fotoóner», «Horeografııa» atalymdary boıynsha óner kórsetti.
2022 jyly Qostanaı áýejaıyna Ahmet Baıtursynulynyń aty berildi.