28 aqpan. QazAqparat kúntizbesi
ATAÝLY KÚNDER
«Nevada-Semeı» halyqaralyq antııadrolyq qozǵalys kúni
1989 jyldyń 25 aqpanynda ıadrolyq qarýǵa qarsy aýqymdy qozǵalystyń tarıhy qazaq jerinen bastaldy. Dál osy kúni jazýshy Oljas Súleımenov KSRO Joǵarǵy Keńesiniń depýtattyǵyna kandıdat retinde óziniń saılaýaldy baǵdarlamasy boıynsha sóz sóıleýi kerek bolatyn. Biraq ol osydan birneshe kún buryn bolǵan eki jarylys (12 jáne 17 aqpan) týraly sóıledi. Osylaısha ol búkil qazaq dalasyna Semeı polıgonynyń qasiret tóndiretinin aıtyp, almatylyqtardy mıtıńge shyǵýǵa úndedi. Keıinnen Qazaqstan Jazýshylar odaǵyna myńǵa jýyq jastar jınaldy. Mıtıńde alǵashqy antııadrolyq qozǵalys quryldy. Oǵan tarıhtaǵy eń úlken ıadrolyq qarý synaǵy ótken eki qalanyń ataýy berilip, «Nevada-Semeı» qozǵalysy ataldy. Qozǵalys basshysy belgili jazýshy Oljas Súleımenov boldy.
Halyqaralyq sırek kezdesetin aýrýlar kúni
Jyl saıyn aqpannyń sońǵy kúni atap ótiledi. Onyń maqsaty-sırek kezdesetin aýrýlar týraly habardarlyqty arttyrý jáne olardy emdeýge qol jetimdilikti jaqsartý. Bul kún 2008 jyly Eýropalyq sırek kezdesetin aýrýlardy zertteý uıymynyń (EURORDIS) bastamasymen engizildi, óıtkeni qazirgi ýaqytta kóptegen sırek kezdesetin aýrýlardy emdeý jetkiliksiz, al sırek kezdesetin aýrýlardyń qurbandary men olardyń otbasy múshelerin qoldaý úshin áleýmettik jeliler nashar damyǵan.
ESTE QALAR OQIǴALAR
1992 jyly QR Baılanys mınıstrligine qarasty «Qaztelekom» kásiporyny Almatyda halyqaralyq spýtnıktik baılanys júıesin ornatatyn Aýstralııanyń «OTS» fırmasymen kelisimshartqa otyrdy. Qazaqstan Aýstralııa arqyly búkil álemmen baılanysý múmkindigine ıe boldy.
2002 jyly Almatyda Ortalyq Azııa memleketteriniń basshylary Ortalyq Azııa yntymaqtastyq uıymyn qurý týraly kelisimge qol qoıdy.
2006 jyly QR Ulttyq kitaphanasynda Ortalyq Azııadaǵy 5 memlekette Keńes odaǵy kezinde túsirilgen fılmdermen qatar, sońǵy 10-15 jylda kórermender nazaryna usynylǵan týyndylar qosa jazylǵan DVD jınaǵynyń tanystyrylymy boldy. Munda Ortalyq Azııa elderinde túsirilip, halyqaralyq baıqaýlarda júldeli oryndarǵa ıe bolǵan 20-ǵa jýyq kórkem fılm 10 DVD dıskige bólinip jazylǵan. Al Qazaqstan jaǵynan Sháken Aımanovtyń «Atamekeni» men Serik Apyrymovtyń «Aqsý» kórkem fılmi engizilse, Qyrǵyzstan men Ózbekstanda túsirilgen fılmder ishinen «Kúrdeli asý», «Beskempir», «Sen - jetim emessiń», «Sheshen», «Kelin», «Hasan arbakesh» sekildi týyndylar basylypty.
2007 jyly Ierýsalımde (Izraıl memleketi) Qazaqstannyń Dúnıejúzilik saýda uıymyna (DSU) kirýi jóninde ekijaqty kelissózder ótti.
2011 jyly Astanada Lıtvanyń syrtqy ister mınıstri Aýdronıýs Ajýbalıs resmı túrde Almatydan kóshirilgen lıtvalyq elshilikti ashty.
2012 jyly Jenevada BUU Ulttar saraıynda «Qazaqstan» kóp salaly zalynyń tanystyrylymy ótti. «Qazaqstan» zaly sınhrondy aýdarma úshin, fılmderdi kórsetý jáne kontserttik baǵdarlamalardy qoıý úshin jańa tehnıkamen jabdyqtalǵan.
2013 jyly QR Prezıdenti N.Nazarbaev Kıshınev qalasynda Qazaqstan Respýblıkasynyń bas konsýldyǵyn ashý týraly Jarlyqqa qol qoıdy.
2017 jyly Dýbaıda ótken Álem kýbogynda paýerlıftıng boıynsha Qazaqstan paralımpıadashylary 2 altyn, 1 kúmis medalǵa qol jetkizdi. Jasóspirimder arasynda 49 keli salmaq dárejesinde Zahar Býılov, 59 kelide Aqjol Jarylǵapov altyn medal aldy. Eresekter arasynda 50 keli salmaqta synǵa túsken Kábıra Asqarova kúmis júldege ıe boldy.
2019 jyly Astana qalasy bilim salasynda ınvestıtsııalyq jobaǵa qol qoıylǵan qazaqstandyq alǵashqy qala boldy. Bıznesmender jobany 100% qarjylandyrýǵa qamtamasyz etedi, al qalalyq bılik qurylys salý úshin jer ýchaskesin zattaı grant túrinde usynady. 1 myń oryndyq mektep pen 250 orynǵa arnalǵan balabaqshasy bar SABIS halyqaralyq mektebiniń qurylysy týraly kelisimge qol qoıyldy.
2020 jyly Nıý-Iorkte «Barclays Arena» juldyzdar galereıasynda atalmysh arenada kontsert bergen Beyonce, Elton John, Justin Timberlake, Rihanna sekildi kóptegen álemdik talanttarmen birge álemge tanymal qazaqstandyq ánshi Dımash Qudaıbergenniń de sýreti paıda boldy.
2022 jyly Qazaqstandyq Zańǵar Nurlanuly Frantsııa astanasynda 14 jasqa deıingi oıynshylar arasyndaǵy Tennis Europe serııasynyń birinshi sanatty sýpertýrnırinde jeńiske jetti. Tennis Europe týrnırler serııasyndaǵy tórtinshi júldesine jetý jolynda ol Avstrııa, Reseı jáne Frantsııanyń myqty oıynshylaryn jeńdi.
2022 jyly Qazaqstan BUU-nyń Adam quqyqtary jónindegi keńesinde jumysyn bastady. Bul Qazaqstannyń 2022-2024 jyldar aralyǵyndaǵy Keńeske múshelik sheńberinde búkil álemde adam quqyqtary men bostandyqtaryn jalpyǵa birdeı quqyqty damytý jáne qorǵaý maqsatynda basqa memlekettermen tıimdi ózara is-qımyl jasaý nıetin rastady. Qazaqstandy keńeske qosý týraly sheshim ulttyq jáne halyqaralyq deńgeıde adam quqyqtaryn qorǵaý jáne ilgeriletý jónindegi kúshti mindettemege negizdelgen.
2022 jyly qazaqstandyq tennısshi Anna Danılına óziniń jeke rekordyn jańartyp, Áıelder tennısi qaýymdastyǵynyń (WTA) reıtınginiń TOP-20 qataryna endi.