27 jeltoqsan. Jylnama
ESTE QALAR OQIǴALAR
1892 jyly qalalyq dýma men 1-gıldııa kópesi Artemıı Derov pen basqa da metsenattardyń kómegimen Pavlodarda qoǵamdyq kitaphana ashyldy. Onyń oqý zaly tegin boldy. Kitaphana 1896 jyldan bastap ýezdik dep atalyp, al ýaqyt óte kele Pavlodar oblystyq kitaphanasyna aınaldy.
1924 jyly Semeıde Orys geografııa qoǵamynyń Abaıdy eske alýǵa arnalǵan májilisi jáne qalalyq teatrda arnaıy keshi ótti. Keshte Muhtar Áýezov Abaı shyǵarmashylyǵy týraly baıandama jasady.
2005 jyly Qazaqstan Respýblıkasy Prezıdentiniń Jarlyǵymen Qazaqstan Respýblıkasy Parlamentiniń 10 jyldyǵy qurmetine arnalǵan merekelik medal bekitildi. Mereıtoılyq medal qazaqstandyq parlamentarızmniń damýy men ornyǵýyna eleýli úles qosqan Qazaqstan Respýblıkasynyń azamattaryn jáne shetel azamattaryn kótermeleý, sondaı-aq Qazaqstan Respýblıkasy Parlamentiniń 10 jyldyǵyn atap ótý maqsatynda belgilengen.
2007 jyly Aqtóbede KSRO halyq ártisi, kompozıtor Ǵazıza Jubanovanyń (1927-1993) eskertkishi ashyldy. Eskertkish onyń esimimen atalatyn oblystyq fılarmonııa ǵımaratynyń aldyndaǵy alańda ornatyldy. Joba avtorlary - músinshiler, QR Sýretshiler odaǵynyń músheleri Jádiger Kenbaı, Marat Ǵabdyrahmanov, Ahmet Qubaı. Eskertkishtiń bıiktigi - 4,5 metr.
2010 jyly QR Ulttyq banki «Erkin kúres». Olımpıada oıyndary-2012» shaqasyn aınalymǵa shyǵardy. Shaqanyń bet jaǵynyń (aversi) tómengi bóliginde stadıonnyń stıldendirilgen beınesimen kómkerilgen Qazaqstan Respýblıkasynyń eltańbasy beınelengen, moneta daıyndalǵan metaldy, onyń synamasyn jáne massasyn bildiretin «Ag 925 31,1g» degen jazý jáne monetanyń soǵylǵan jylyn bildiretin «2010» degen san jazylǵan. Qyry bederli. Shaqa 925-shi synamaly kúmisten jasalǵan, massasy - 31,1 gramm, dıametri - 38,61mm, «proof» sapasymen daıyndalǵan. Eń kóp taralymy - 12 myń dana (3 myń danasy Qazaqstannyń ishki naryǵy úshin).
2011 jyly ǵalamshardyń ońtústik núktesinde Qazaqstannyń Týy jelbiredi. Ony qazaqstandyq ekspedıtsııanyń músheleri ornatty. Qazaqstandyq polıarshylar Ońtústik polıýske segiz kún júrse, qaıtar joly bes kúnge sozyldy. Bul biregeı saparynan estelik retinde polıarshylar Astana qalasynyń ákimine Memlekettik Tý men Astana týyn, sondaı-aq saparlarynda birge ustaǵan Konstıtýtsııa úlgisin syıǵa tartty.
2014 jyly BUU mıssııasynyń Batys Saharadaǵy áskerı kontıngentiniń qolbasshysy, general-maıor Imam Edı Mýlıono mıssııa qyzmetiniń 2014 jylǵy qorytyndylaryn shyǵarý keńesinde qazaqstandyq «kógildir beretterdiń» Batys Saharada beıbit ómirdi qamtamasyz etýdegi úlesin atap ótti. BUU mıssııasynyń áskerı baıqaýshylary retinde bul elge qazaqstandyq «Qazbat» bitimgerlik batalonynyń ofıtserleri Bahtııar Aqbalaev, Temirlan Músápirov, Talǵat Tasbolatov jiberildi. Olardyń negizgi mindeti - patrýldeý, monıtorıng júrgizý jáne jaǵdaıdy jetkizip otyrý.
2016 jyly Qazaqstan Respýblıkasynyń Ulttyq banki «proof» sapasymen «Qazaqstannyń beıneleý óneri» monetalar serııasynan nomınaly 500 teńgelik «Qazaq valsi» eskertkish kúmis shaqalaryn aınalymǵa shyǵardy. «Qazaq valsi» monetasy - ulttyq mádenıetimizdiń baı murasyn tanymal etýge arnalǵan jáne «Qazaqstannyń beıneleý óneri» atty jańa monetalar serııasynyń alǵashqysy. Monetanyń reversinde qazaqtyń áıgili bıshisi, Qazaq KSR Halyq ártisi Shara Jıenqulovanyń bılep turǵan keıpi salynǵan sýretshi Gúlfaırýs Ysmaıylovanyń «Qazaq valsi» kartınasy (Á. Qasteev atyndaǵy Qazaqstan Respýblıkasynyń Memlekettik óner murajaıy) beınelengen.
2017 jyly «QazAqparat» Halyqaralyq aqparat agenttigi men Qazaqstannyń Ulttyq Olımpıada komıteti yntymaqtastyq týraly memorandým ornatty. Sonyń aıasynda «QazAqparat» HAA UOK-tyń «Resmı aqparattyq seriktes» statýsyna ıe bolǵan alǵashqy aqparat agenttigi boldy. Yntymaqtastyq aıasynda elimizdiń bas lentasy - «QazAqparat» HAA «SPORTINFORM» Sport aqparat agenttigi arqyly Ulttyq Olımpıada komıtetine aqparattyq qoldaý kórsetetin boldy.
2017 jyly «Rýhanı jańǵyrý» atty respýblıkalyq jýrnal jaryqqa shyqty. Alǵashynda 1000 tırajben basylyp shyqqan túrli-tústi jýrnal elimizdiń jańǵyrý jolyndaǵy jetistikteri men jeńisterin pash etti. Basylymda jan-jaqty ári salmaqty taqyryptar qamtylmaq. Aqyldastar alqasy da zııaly qaýym ókilderinen, elge tanymal azamattardan quralǵan.
2018 jyly Zyrıan aýdany men Zyrıanovsk qalasy Altaı aýdany jáne Altaı qalasy bolyp ózgerdi. «Qala men aýdan atyn ózgertý týrızmdi damytýǵa jańasha serpin beredi. Ózgeris tarıhı turǵyda durys jáne ekonomıkalyq turǵyda ózin aqtaıtyn sheshim bolady dep esepteımin», - dedi Shyǵys Qazaqstan oblysynyń ákimi Danıal Ahmetov.
2019 jyly «Saryarqa» magıstraldyq gaz qubyrynyń qurylysy aıaqtalyp, paıdalanýǵa berildi. Qyzylorda oblysynan bastaý alǵan «Saryarqa» gaz qubyry Nur-Sultan, Qaraǵandy, Temirtaý, Jezqazǵan qalalarynyń turǵyndaryn otandyq kógildir otynmen qamtamasyz etýge múmkindik beredi. Gaz qubyry trassasynyń boıyna jaqyn ornalasqan 171 eldi mekenniń shamamen 2,7 mln turǵyny tabıǵı gazǵa qol jetkizedi.
2020 jyly Brazılııada Ze Salvador ádebı laqap atymen tanymal aqyn-kordelıst Hose Vashıngton de Soýza jazǵan «Sóz – ashyńqyra esikterdiń kilti» dep atalatyn rıfma túrinde ádebıeti-kordel jaryqqa shyqty.
2020 jyly alǵash ret portýgal tiline aýdarylǵan Abaı Qunanbaıulynyń «Qara sózderi» kitabyndaǵy fılosofııalyq traktattary men astarly áńgimeleri brazılııalyq aqynǵa Abaıdyń ómiri men shyǵarmashylyǵy týraly ǵana emes, Qazaqstannyń táýelsizdik jyldaryndaǵy jetistikteri týraly baıandaıtyn poemaǵa aınalǵan tanymal alty shýmaq jazýǵa shabyt berdi.
2021 jyly Qaraǵandy oblysynda Aqseleý Seıdimbek atyndaǵy murajaı ashyldy. Onda qoǵam qaıratkeri, belgili etnograf, ónertanýshy, jýrnalıst jáne pýblıtsısttiń eńbekteri, ómirbaıandyq derekteri, jeke zattary jınaqtalǵan.
2021 jyly Ál-Farabı atyndaǵy Qazaq ulttyq ýnıversıtetinde belgili jýrnalıst, Qazaqstannyń eńbek sińirgen qaıratkeri, «Parasat» ordeniniń ıegeri Nurtileý Imanǵalıuly atyndaǵy oqý-shyǵarmashylyq zerthanasy ashyldy.
2021 jyly Almatyda qaterli isik dıagnostıkasy boıynsha ıAdrolyq medıtsına ortalyǵy ashyldy. Bul elimizdegi qyzmeti onkologııalyq aýrýlardy dıagnostıkalaýǵa baǵyttalǵan alǵashqy ınnovatsııalyq medıtsınalyq ortalyq.Almaty ıadrolyq medıtsına ortalyǵynda qoldanylatyn qural-jabdyqtar dárigerlerge jylyna 7 myńǵa deıin naýqasty qabyldaýǵa múmkindik beredi. Bul emdeý men dıagnostıkany qajet etetin qazaqstandyqtarǵa keshendi tekserý protsedýrasyn kútý ýaqytyn aıtarlyqtaı qysqartýǵa kómektesedi.
2022 jyly Qazaqstan úkimeti Qazaqstan Ulttyq ǵylym akademııasy jarǵylyq kapıtalyna memlekettiń 100% qatysýy bar kommertsııalyq emes aktsıonerlik qoǵam bolǵan qaýly qabyldady.