27 jastaǵy mańǵystaýlyq vaktsına saldyryp, páter utyp aldy

AQTAÝ. QazAqparat - Mańǵystaýda «Ekpe saldyr da, páter utyp al» naýqanynyń qorytyndysy belgili boldy, dep habarlaıdy QazAqparat tilshisi.

27 jastaǵy mańǵystaýlyq turǵyn Qaırat Qosaevqa 38-inshi shaǵynaýdanda ornalasqan 2 bólmeli páterdiń kilti tabystaldy. Jańa úıdi «K7 Group» qurylys kompanııasy salǵan.

Jeńimpazdyń aıtýynsha, vaktsınany ol utysqa qatysý úshin emes, óz densaýlyǵyn kútý maqsatynda saldyrǵan. Ol oblys turǵyndaryn qazirgi epıdemıologııalyq ahýalǵa salmaqty qarap, ekpe alýǵa shaqyrdy.

«Uıymdastyrýshylarǵa kóp raqmet. Bastapqy ýaqytta bul naýqanǵa sengen joqpyn. Qazir shynaıy ekenine kózim jetip otyr. Qýanyshtymyn. Jeke baspanam joq edi, endi ata-anam Aqtaýǵa kóship kelgende turatyn úıi daıyn», - dedi Qaırat Qosaev.

Eske sala keteıik, naýqan bir jarym aıǵa deıin sozyldy. 40-qa jýyq adam baǵaly syılyqtardyń ıesi atandy.