27 ret emtıhan tapsyrǵan 56 jastaǵy qytaılyq bıyl da ýnıversıtetke túse almady
56 jastaǵy Lıan Shı kóp jaǵynan tabysty, shat-shadyman ǵumyr keshti. Túrli salalarda jumys istedi, óz kásibin ashyp, úılenip, uldy boldy.
Biraq onyń qol jetpegen bir armany bar, ol - joǵary oqý ornyna túsip, dıplom alý. Alaıda ony isteı almaǵany - baǵyn synap kórmegennen nemese daıyndalyp, tyryspaǵannan emes. Ol oqýǵa túsý úshin 26 márte synaq tapsyrǵan.
Lıan maýsymnyń basynda búkil el boıynsha 13 mıllıonǵa jýyq stýdentpen birge gaokao dep atalatyn eki kúndik aýyr emtıhandy tapsyrdy.
Bul - onyń 27-shi ret gaokaoǵa qatysýy. 40 jyl buryn, ıaǵnı 1983 jyly ol alǵash ret osy synaqty tapsyrǵan, sodan beri alǵan upaıyna esh qanaǵattanǵan emes.
Gaokao - Qytaıda joǵary oqý ornyna túsýdiń jalǵyz krıterııi. Úmitkerlerge jylyna bir ǵana múmkindik beriledi.
Lıan óziniń tabandylyǵynyń arqasynda Qytaıda birshama tanymal. Biraq áli kúnge deıin kózdegen kórsetkishine jete almady.
Gaokaony aıaqtaǵannan keıin ol TikTok-tyń Qytaıdaǵy balamasy Douyin-ge vıdeo túsirip, bıyl emtıhan suraqtary aýyr bolǵanyn, jaqsy upaı jınaı almaýy múmkin ekenin aıtty.
«Bıyl jaqsy ýnıversıtetke túse almaýym múmkin», - dedi ol vıdeoda.
Juma kúni jarııalanǵan test qorytyndysy onyń qorqynyshyn rastady. Lıan jalpy 750 upaıdan 428 ball aldy, bul onyń aldyńǵy jylǵy nátıjesinen tómen.
Bul jyldar boıy reıtıngte kósh basynda turǵan Sychýan ýnıversıteti sııaqty elıtalyq joǵary oqý ornyn bylaı qoıǵanda, keı kolledjderge túsýge de jetkiliksiz.
«Qatty kóńilim qaldy, shynymen. Upaıym sonshalyqty nashar bolady dep kútpedim. Bul jolǵy synaq sátsiz bolǵanyn sezsem de, ótken jylǵydan tómen ball alamyn dep oılamadym», - dedi ol jergilikti buqaralyq aqparat quralynyń áleýmettik jelidegi tikeleı efırinde.
Gaokao tórt pándi qamtıdy: qytaı tili, matematıka, aǵylshyn tili jáne jaratylystaný ǵylymdary (fızıka, hımııa jáne bıologııa) nemese gýmanıtarlyq ǵylymdar (saıasat, tarıh jáne geografııa).
Lıan tikeleı efırde «barlyq pánderden kóńili qalǵanyn» aıtty, ásirese qytaı tili jáne gýmanıtarlyq óner pánderinen erekshe tómen upaı alǵan.
Sychýan týmasy Lıan 1983 jyly talapker retinde alǵash ret gaokao tapsyrdy, biraq kolledjge túsýge jetkilikti eń tómengi balldy da jınaı almady.
Odan keıin taǵy eki jyl tapsyryp, aldyńǵylaryna uqsas nátıje kórsetti.
Kelesi on jylda ol tehnıka mektebinde bilim aldy, biraq kóp uzamaı oqýyn tastady. Basqa da túrli jumys istep, aǵash zaýytynda eńbektendi, sosyn úılendi.
Osynyń bárine qaramastan, ol gaokao tapsyrýyn jalǵastyra berdi jáne arasynda táýir upaı jınaǵan kezi de boldy. Mysaly 1992 jyly Nankın ýnıversıtetine túsýge jetkilikti joǵary ball jınaǵan. Biraq ózine kóńili tolmaı ol usynystan bas tartty.
Gaokaoda qoıylatyn talaptarǵa baılanysty ol synaq tapsyrýdy toqtatty. Óıtkeni jasy asyp ketti. Sol aralyqta satýshy bolyp jumys istedi, zaýyt ashyp, kásipkerlikpen aınalysty.
2001 jyly úkimet testileýge qoıylatyn jas shekteýin alyp tastap, talpynysyn qaıta bastaýǵa múmkindik berdi.
Lıan Shı 2010 jyldan beri jyl saıyn gaokao tapsyrady.
Bıyl ol synaqqa jaqsy daıyndaldy, kóp oqyp, eńbektendi jáne qaı ýnıversıtetke baly jetse, soǵan túsýge bel býdy.
Sychýan ýnıversıtetine shamasy jetpeıtinin moıyndap, ózin qabyldaıtyn kez kelgen negizgi ýnıversıtetke túsýge sheshim qabyldady.
Biraq juma kúni nátıjesin kórgende 2024 jyly testileýdi qaıta tapsyratynyn túsindi.
«Kelesi jyly da maqsatyma jete almasam, onda joǵary oqý ornyna túsý jaıly armanymnan bas tartýym múmkin», - deıdi ol.
Bıyl Qytaıda 12,91 mln úmitker gaokao tapsyrǵan, bul ótken jylǵydan 980 myńǵa kóp.
Qytaıda jastar arasynda jumyssyzdyq rekordtyq deńgeıde - 20,8%. Sarapshylar onyń taǵy birneshe jyl boıy joǵary kúıinde qala beretinin eskertip otyr.