27 naýryz - Muqaǵalı Maqataevtyń ómirden ótken kúni

TALDYQORǴAN. QazAqparat - Búgin aqıyq aqyn Muqaǵalı Maqataevtyń qaıtys bolǵanyna 45 jyl boldy. Taldyqorǵandaǵy M. Tynyshpaev atyndaǵy Almaty oblystyq ólketaný mýzeıinde «Muqaǵalı - máńgilik ǵumyr» atty eske alý keshi ótti, dep habarlaıdy QazAqparat tilshisi.

Sharaǵa aqynnyń uly Juldyz Muqaǵalıuly, Kelini Baqytgúl Qydyrbaıqyzy, QR eńbek sińirgen qaıratkeri Asqar Naımantaev pen jetisýlyq aqyn-jazýshylar, sazgerler qatysyp, qalamger týraly estelikterimen bólisti. Rýhanı keshte aqyn óleńderine jazylǵan ánder shyrqalyp, arnaýlar oqyldy.

Sharaǵa qatysqan aqynnyń jerlesi, oblystyq «Jetisý» gazeti bas redaktorynyń orynbasary Jumataı Ospanuly Facebook-tegi paraqshasynda Muqaǵalı Maqataev týraly kelesideı salmaqty oı-túıin jazyp otyr.

«Densaýlyǵynyń syr bergenin bilip, Ázireıil perishteniń qaı sátte de janyn alýǵa ázir ekenin sanasymen túısinip, sóz qudireti arqyly óz taǵdyrynyń túgesilip bara jatqanyn sezingen aqyn júrektiń sózin aq paraqtyń betine bylaısha tógipti:

Ózimniń esebimde,

Men bıyl dál qyryqtyń beseýinde.

Kim biledi...

Endigi qalǵan ómir,

Neshe jylǵa jeterin,

Neshe kúnge

Umyt bolyp esebiń, ósegiń de,

Uıyqtap ketsem bolǵany tósegimde,

Qyryqtyń beseýinde.

Aıtqany Aıdaı anyq keldi aqynnyń. Osydan dál 45 jyl buryn, ıaǵnı dál búgingi 27 naýryz kúni Muzart shyńnyń muzbalaǵy atanǵan Muhametqalı (Muqaǵalı) Súleımenuly ajal saǵaty jetkende kóshede emes, dalada emes, aýrýhana bólmesindegi ózine tıesili tóseginde endi qaıta oıanbastaı uıyqtap ketti. Dál qyryqtyń beseýinde!» dep jazady aqyn Jumataı Ospanuly.