27 qazanda Ózbekstanda parlament saılaýy ótedi

<p>TAShKENT. KAZINFORM &ndash; Ózbekstannyń Ortalyq saılaý komıssııasy parlament jáne jergilikti kengash depýtattarynyń saılaýyn 27 qazanda ótkizý týraly sheshim qabyldady, dep habarlaıdy Kazinform agenttiginiń Tashkenttegi menshikti tilshisi Álıhan Asqar.&nbsp;</p>

Saılaý naýqany búginnen, ıaǵnı 26 shildeden bastalady. 

Aıta keteıik, buǵan deıin Ózbekstanda parlamenttiń ókilettigin ózgertýdi kózdeıtin zań qabyldanǵan edi. 

Qujatqa saı, parlament palatalarynyń bir-birin qaıtalaıtyn ókilettikteri naqtylandy. Endi senatorlardyń jalpy sany 100-den 65-ke deıin qysqarady. Bul rette árbir ákimshilik aýmaqtan 4 senatordan saılanady, al qalǵan 9 depýtatty prezıdent taǵaıyndaıdy. 

Sondaı-aq Zań shyǵarý palatasy spıkeriniń orynbasarlary 7-den 2-ge deıin qysqarady. Olar óz mindetin atqarý kezeńinde fraktsııa quramynda bolmaıdy jáne saıası partııaǵa músheligin toqtata turady. 

Qujatta jazylǵandaı, Zań shyǵarý palatasy men Senatqa ózin-ózi taratý ókilettigi beriledi. Bul jaǵdaıda Zań shyǵarý palatasyndaǵy jańa saılaý 2 aı aralyǵynda, al Senattyń jańa quramy bir aı ishinde jasaqtalýy tıis. 

Foto: Kazinform

Endi Ózbekstanda bir adam qatarynan eki merzimnen artyq Bas prokýror laýazymyna taǵaıyndala almaıdy. Mundaı tyıym Senat tóraǵasy men Zań shyǵarý palatasynyń spıkerine de qoldanylady. Buryn olardyń laýyzymdy ıelený ýaqytyna qatysty eshqandaı shekteý bolmaǵan edi. 

Sonymen qatar Senat ókilettikteriniń bir bóligi parlamenttiń Zań shyǵarý palatasyna beriledi. Atap aıtqanda, oǵan premer-mınıstr laýazymyna taǵaıyndalatyn kandıdatýrany kelisý jáne maquldaý, mınıstrler kabınetiniń múshelerin bekitý, memlekettik bıýdjettiń atqarylýyn baqylaý, Esep palatasynyń esebin qaraý jáne basqa da quzytter jatady. 

Óz kezeginde parlamenttiń joǵarǵy palatasy prezıdenttiń usynysy boıynsha Konstıtýtsııalyq sot pen Joǵarǵy sottyń, Joǵarǵy sýdıalar keńesiniń jáne basqa vedomstvolardyń tóraǵalaryn saılaýǵa jaýapty bolady. Munymen qatar, Senat memleket basshysynyń vedomstvolardy qurý jáne taratý týraly jarlyqtaryn bekite alady. 

Al, Senattyń sandyq quramy men komıtetterdiń ataýlaryn, sondaı-aq zań shyǵarý palatasy spıkeri orynbasarlarynyń sany men mártebesin aıqyndaıtyn zań erejelerin bıyl parlamenttik saılaý qorytyndysy negizinde iske asyrý josparlanyp otyr.