260 mln teńgeni qaltasyna basyp, on jyldan beri qashyp júrgen kúdikti Dýbaıda ustaldy
Búgin Bas prokýratýra men ІІM qyzmetkerleri Syrtqy ister mınıstrliginiń kómegimen kúdikti Sh-ny asa iri kólemde alaıaqtyq jasaǵany úshin qylmystyq jaýapkershilikke tartý maqsatynda Birikken Arab Ámirlikterinen ekstradıtsııalady.
Ol 2010 jyly tanysyn aldaý arqyly bankten nesıe alý úshin kepildik berýshi retinde áreket etýge kóndirgen jáne aqshany alǵannan keıin jasyrynyp, jábirlenýshige 260 mıllıon teńgeden astam shyǵyn keltirdi degen kúdikke ilingen.
Qylmys jasaǵannan keıin kúdikti jasyrynyp, 10 jyldaı halyqaralyq izdeýde bolǵan.
Ótken jyldyń sońynda ol Birikken Arab Ámirlikterinde ustaldy.
Qazirgi ýaqytta kúdikti Astana qalasynyń ýaqytsha ustaý ızolıatoryna qamaldy.
Atalǵan qylmysty jasaǵany úshin múlki tárkilenip, 5 jyldan 10 jylǵa deıingi merzimge bas bostandyǵynan aıyrý jazasy qarastyrylǵan.