258 myńnan astam júkti jáne bosanǵan áıel áleýmettik tólem alady

ASTANA. QazAqparat – Eńbek jáne halyqty áleýmettik qorǵaý mınıstri Tamara Dúısenova ana men balany jáne kópbalaly analardy qoldaý boıynsha atqarylyp jatqan memlekettik sharalar týraly aıtyp berdi, dep habarlaıdy QazAqparat tilshisi.

«Bıyl ana men balany qoldaý jónindegi sharalarmen 2,1 mln otbasy qamtylady. Atalǵan otbasylarǵa memlekettik bıýdjet jáne memlekettik áleýmettik saqtandyrý qory esebinen 1,2 trln teńge baǵyttalady. Sonymen qatar, bıyl Memlekettik áleýmettik saqtandyrý qorynan 258 myńnan astam júkti jáne bosanǵan áıelder áleýmettik tólem alady.1 qańtardan bastap bala týýǵa arnalǵan birjolǵy járdemaqy mólsheri ulǵaıtyldy. Sol sııaqty bıyl birinshi, ekinshi jáne úshinshi bala týylǵan kezde otbasy 131 myń teńge alady, al tórtinshi bala úshin 217 myń teńgeden astam járdemaqy beriledi», - dedi Tamara Dúısenova Úkimet otyrysynda.

Odan ári mınıstr kóp balaly analardy qoldaý sharalaryna toqtaldy.

«Tórt balasy bar otbasyǵa tólenetin aı saıynǵy járdemaqynyń eń tómengi mólsheri 55 myń teńgeden sál asady. Al 8 jáne odan da kóp balaly otbasylarǵa eń joǵary mólsheri 110 myń teńgeni quraıdy. Bıyl atalǵan járdemaqyny qarjylandyrý kólemi 410 mlrd teńgege 544 myń otbasyna tóleý josparlanyp otyr. «Altyn alqa» jáne «Kúmis alqamen» marapattalǵan analarǵa taǵy bir járdemaqy bar. Ol ómir boıy taǵaıyndalady jáne aı saıyn tólenedi. Búginde atalǵan járdemaqyny 230 myń ana alyp otyr. Ol úshin respýblıkalyq bıýdjetten 61 mlrd teńge qarastyrylǵan», - deıdi vedomstvo basshysy.