2500 qazaqstandyq stýdent Reseı men Ýkraınadan otandyq JOO-larǵa aýysty

ASTANA. QazAqparat – QR Ǵylym jáne joǵary bilim mınıstri Saıasat Nurbek Qazaqstanda reseılik JOO fılıaldaryn ashý jóninde pikir bildirdi, dep habarlaıdy QazAqparat tilshisi.

«Qańtar aıynda Prezıdent Qasym-Jomart Toqaev Qazaqstanǵa tehnıkalyq mamandar qajet ekenin jáne Reseıdiń tehnıkalyq oqý oryndary bizdiń stýdentterimiz úshin basym baǵyt bolatynyn aıtqan edi. Biraq bul usynys týraly sońǵy kezde az estip júrmiz. Ol týraly Prezıdenttiń sońǵy Joldaýynda da aıtylǵan joq. Bastama qazir de óz kúshinde me? Bıyl Reseıge oqýǵa baratyn stýdentter sany artty ma?», - dep jaýap berdi mınıstr Ortalyq kommýnıkatsııalar qyzmetinde jýrnalıst suraǵyna.

Óz jaýabynda mınıstr tehnıkalyq mamandardy basym túrde daıarlaý tapsyrmasy tolyqqandy júzege asyp jatqanyn aıtty.

«Bıyl memlekettik tapsyryspen 88 myń grant berilse, onyń 60 paıyzy ınjenerlik-tehnıkalyq mamandyqtarǵa bólingen. «Bolashaq» baǵdarlamasynda da 65 paıyzǵa jýyq stıpendıattar ınjenerlik-tehnıkalyq mamandyqtarǵa jiberiledi. Reseıdiń jetekshi tehnıkalyq ýnıversıtetteriniń eki fılıaly Qazaqstanda ashyldy. Bıyl 2 qyrkúıekte Atyraýdaǵy S. Ótebaev atyndaǵy munaı-gaz ýnıversıtetinde I. Gýbkın atyndaǵy Reseı munaı-gaz ýnıversıtetiniń fılıaly ashyldy. Al 12 qyrkúıekte ál-Farabı atyndaǵy QazUÝ negizinde ataqty Máskeý ınjenerlik-fızıkalyq ınstıtýtynyń fılıaly ashyldy. MIFI ıadrolyq ýnıversıtetimen ıadrolyq energetıka jáne aqparattyq qaýipsizdik salasynda eki úlken baǵdarlama bastadyq. Sondyqtan bul tapsyrmalar tolyqqandy júzege asyrylýda. Endi bizdiń talapkerlerdi Reseıge jibermeı-aq, óz elimizde eń myqty reseılik ınjenerlik ýnıversıttterden bilim alýǵa bolady», - dep jaýap berdi S. Nurbek.

Sonymen birge, Ǵylym mınıstri Reseı men Ýkraınadan elge aýysqan qazaqstandyq stýdentter týraly aıtty.

«Reseıge oqýyn jalǵastyrǵysy keletinderge esh shekteý joq. Birneshe myń qazaqstandyq Reseıde oqyp jatyr. Al Reseı men Ýkraına ýnıversıtetterinen qazaqstandyqtar aýystyryldy ma deseńiz, mamyr aıynan bastap Reseıden 2500 stýdent, Ýkraınadan 34 stýdent Qazaqstan JOO-laryna aýystyryldy», - dedi S. Nurbek.

Buǵan deıin Ǵylym jáne joǵary bilim mınıstri óz balalarynyń qaıda bilim alyp jatqany týraly jýrnalıster suraǵyna jaýap bergen edi.