250 aqmolalyqtyń mindetti tólemderi 3 jyl boıy tólenbegen
22:50, 21 Sáýir 2022
KÓKShETAÝ. QazAqparat – Aqmola oblysynyń Atbasar aýdanynda 3 jyl boıy áleýmettik aýdarymdar, zeınetaqy jáne mindetti áleýmettik medıtsınalyq saqtandyrý jarnalary tólenbeı kelgen 250 jumysshynyń konstıtýtsııalyq quqyqtary qorǵaldy, dep habarlaıdy QazAqparat tilshisi.
«Prokýrorlar Esengeldi aýylynyń turǵyndarymen kezdesý barysynda jergilikti kásiporyndardyń biri 250 jumysshyǵa úsh jyl boıy áleýmettik aýdarymdar, zeınetaqy jáne mindetti áleýmettik medıtsınalyq saqtandyrý jarnalaryn aýdarmaǵanyn anyqtady. Tólenbegen jarnalar men aýdarymdardyń jalpy somasy - 23 mıllıon teńgeden asyp ketken. Aýdan prokýratýrasynyń aralasýynan keıin «Tlekei Agro» JShS-niń barlyq qyzmetkerlerine zań talaptaryna sáıkes tólemderi tolyqtaı óteldi. Azamattardyń konsıtýtsııalyq quqyqtary qorǵaldy»
, - dedi oblystyq prokýratýranyń baspasóz qyzmetinen.
Kezdesý «Halyq únine qulaq asatyn memleket» tujyrymdamasy aıasynda Atbasar aýdany prokýratýrasynyń «Ashyq esik kúni» kóshpeli aktsııasy barysynda ótken.
Aıta ketsek, Aqmola oblysynda memlekettik organ ǵımaratyn órtemek bolǵandar izdestirilip jatyr.