25 jeltoqsannan Mańǵystaý oblysynda karantın talaptary kúsheıtiledi
Málim etilgendeı, óńirde koronavırýspen syrqattanýshylar sanynyń kóptep tirkelýine baılanysty oblystyq jedel shtab jańa qaýly ázirlep jatyr. Oǵan sáıkes, Mańǵystaý jáne Atyraý oblystarynyń arasynda sanıtarlyq post qoıylady. Naqtyraq aıtqanda, kórshi oblyspen shektesetin Beıneý aýdany Boranqul eldi mekeninde óńirge ótkizip-shyǵarý sharalary kúsheıtiledi. Buǵan Atyraý oblysynyń koronavırýs kórsetkishteri boıynsha «qyzyl aımaqqa» kirýi sebep bolyp otyr.
«Mańǵystaý jáne Atyraý oblystary arasyndaǵy ádettegi emin-erkin qatynas toqtatylady. Osy baǵytta qozǵalý azyq-túlik, dári-dármek sekildi mańyzdy taýarlar tasý úshin nemese jumys babymen júrgen azamattarǵa ǵana ruqsat etiledi. Atyraý oblysynyń aýmaǵynda vahtalyq tásilmen jumys isteıtin óńir turǵyndary eki oblystyń aýmaǵynan erkin óte alady. Olardan PTR-testiniń nátıjesi suralmaıdy. Alaıda, Atyraý oblysynyń aýmaǵyna ótýge ruqsat etilgen azamattar Mańǵystaý oblysyna keri qaıtar kezde sanıtarlyq bekette anketa toltyrýǵa mindetti. Sebebi, olar ári qaraı medıtsınalyq baqylaýda bolady», - dedi ol.
Jańa qaýlyǵa sáıkes, azyq-túlik jáne azyq-túlik emes, ashyq, jabyq bazarlar qyzmeti 18:00-ge deıin qysqarady. Saýda, oıyn-saýyq ortalyqtary, gıpermarketter, sýpermarketter jumysy 22:00-ge deıin jalǵasady. Kınoteatr qyzmetine 20:00-ge deıin ǵana ruqsat.
Sondaı-aq, korporatıvtik sharalar, toı, balalarǵa arnalǵan erteńgilikter men taǵy basqa buqaralyq jıyndarǵa, otbasylyq basqosýlarǵa qatań tyıym salynady. Karantın talaptarynyń oryndalýy udaıy monıtorıngilik toptardyń baqylaýynda bolady.
Buǵan deıin qonaq úı, hostel sııaqty týrızm salasyndaǵy nysandar 70% tolyqtyrýmen jumys istese, endi atalǵan mekemeler 50% syıymdylyǵymen qyzmet kórsetýge mindetti.
Óndiris oryndarynan basqa, keńse basshylary qaramaǵyndaǵy qyzmetkerleriniń 70% qashyqtan jumys isteýge kóshirýi tıis.
Aıta keteıik, sońǵy 1 aptada óńirde koronavırýs ınfektsııasyn juqtyrǵandar sany 10-nan 17-ge deıin ósti.