25 jasynda bes balany baýyryna basqan jambyldyq Altynaı týraly bilesiz be
Altynaı Tapelova bıyl otyz jasqa aıaq basty. Ol asyrap alǵan bes perzenti barda ózin eshqashan jalǵyz sezinbeıtinin aıtady.
Sarysý aýdany Jaıylma aýylynda kópbalaly otbasynda dúnıege kelgen ol úıdiń úlkeni. Іzinen ergen tórt inisine ápkelik meıirimin aıamaıtyn Altynaıdyń ákesi de, anasy da ómirlerin ustazdyq jolǵa, bala tárbıesine arnaǵan qarapaıym jandar.
Taraz memlekettik pedagogıkalyq ýnıversıtetin támamdaǵannan keıin eńbek jolyn Jýaly aýdany Qarabastaý aýylyndaǵy mektepte ustazdyq etýden bastaǵan keıipkerimiz keıinnen Talas aýdandyq bilim bólimine aýysyp, bala quqyǵyn qorǵaý jónindegi maman atanǵan. Osynda júrgende Altynaıdyń ómirinde úlken ózgeris bolady.
Ol týraly ózi bylaı áńgimeleıdi: «2016 jyly Merki aýdanynan bes balasynan bas tartqan ana týraly aqparat jetip, olardy Talas aýdanyndaǵy naǵashylary baýyryna basqanyn estidim. Biraq shamamen tórt aı ótkende naǵashylary bizge habarlasyp, balalardy asyraý qıynǵa soǵyp jatqanyn, sol sebepti olardy balalar úıine ótkizýge nıetti ekenin jetkizdi. Qujattary aldyma kelgennen keıin qazan aıynda atalǵan mekenjaıǵa bardym. Talasta sol jyly qar erte túsip, yzǵar betti qarıtyndaı bolyp turǵan. Barsam, bes bala bir bólmede búrseń qaǵyp otyr eken. Naǵashylarynyń turmysy tómendigi sonshalyq, balalarǵa ne kúzdik, ne qystyq kıim alyp bere almapty. Sodan beseýin de jetektep úıge alyp keldim. Eń kishisi Іńkár ol kezde nebári 3 jasta bolatyn. Balalar moınymnan qushaqtap, boıymnan analyq sezimdi qalaı oıatqanyn ózim de túsinbeı qaldym»,-deıdi Altynaı ótkenge bir sát oısha oralyp.
Balalardy alǵash úıine ákelgende Altynaıdyń ákesi men anasy jyly qabyldap, kórshilerdiń kómegimen qajetti kıim-keshek alyp beripti. Alaıda belgilengen talap boıynsha úsh kúnnen keıin balalardy Taraz qalasyndaǵy balalar úıine ótkizýge alyp barýǵa týra kelgen. Sol kezde nebary 2-3 kún ishinde oıanyp úlgergen bir-birlerine degen súıispenshilik pen qımastyq sezim olardyń jolynyń bir arnada toǵysýyna sebep bolǵan.
«Shynymdy aıtaıyn, bosaǵadan attap, balalar úıine kire almadym. Kólikte kóterińki kóńilmen kele jatqan beseýiniń de balalar úıin kórgende túrleri buzylyp, únsiz otyryp qaldy. Sodan sol kúni «qujattary durys bolmaı qaldy» degen jeleýmen balalardy qaıta úıge alyp keldim. Sodan bes balany asyrap alý týraly sheshimge keldim. Qarsy bolǵandar da boldy. Bireýler áli jas ekenimdi aıtsa, endi biri bulaı óz ómirimdi qurtatynym týraly keńes berdi. Biraq eshteńege qaramastan, 10 kún ishinde qujattardy rásimdep, balalardy patronattyq tárbıege alý týraly ruqsatnama qaǵazǵa qol jetkizdim», - dedi ol.
Balalardyń úlkeni Dılnaz bıyl mektep bitirip, Qarataý qalasyndaǵy TarMÝ-dyń kolledjine oqýǵa túsipti. Odan keıingi Dosjan – 12 jasta. Ernat 11-de bolsa, Nurdáýlet 9 jasqa tolyp otyr. Al, eń keńjesi Іńkár – 8 jasta. Barlyǵy Talas aýdanyndaǵy Sh.Ýálıhanov atyndaǵy mektepte bilip alýda.
Altynaıdyń ózi búginde Talas aýdandyq ishki saıasat bóliminiń sektor meńgerýshisi bolyp qyzmet etedi. Biraq, ol qyzmetten buryn balalarynyń baqytyn aldyǵa qoıatynyn aıtady. Qazirgi tańda bes perzenti ózin mama dep ataıtynyn aıtqan ol, osy sózdi estigende júregi eziletinin, turmys qurmaı-aq, óziniń analyq sezimdi keship otyrǵanyn aǵynan jaryla jetkizdi. Endigi armany – balalardyń baqytyna kýá bolyp, ómirden óz úlesterin alýyna barynsha jaǵdaı jasaý. Ol úshin bárine daıynmyn deıdi ol.