25 myńǵa jýyq atyraýlyq 580 mln teńgeden astam salyǵyn tólemeı júr
Atyraý oblystyq memlekettik kirister departamentiniń baspasóz qyzmetinen málim etkendeı, turǵyndardyń jyljymaıtyn múlik pen kólik salyǵyna bereshegi 580,2 mln teńgege jetken.
Onyń ishinde tólenbegen kólik salyǵy - 549,6 mln teńge.
«Bereshek somasy 1 aılyq eseptik kórsetkishten asatyn boryshkerlerdiń tizimi óndirip alý úshin jeke sot oryndaýshylarǵa jiberiledi. Zańnamaǵa sáıkes jeke sot oryndaýshylary banktik shottar men múlikke tyıym salýǵa quqyly. Al, 40 aılyq eseptik kórsetkishten asatyn bereshek somasy barlarǵa Qazaqstan Respýblıkasynyń aýmaǵynan shyǵýǵa tyıym salynýy múmkin. Jeke sot oryndaýshylary bereshek somasynan basqa bereshek somasynyń 25 paıyzyna deıingi mólsherde qosymsha aqyny óndirip alady», -dep habarlady departamenttiń baspasóz qyzmeti.
Eske sala ketelik, budan buryn atyraýlyqtar kólikke 355 mln teńge salyq tólemegenin habarlaǵan bolatynbyz.
Oblystyq memlekettik kirister departamentiniń basqarma basshysy Nurbolat Sarmanovtyń málimetinshe, 9 myńǵa jýyq turǵyn kólik salyǵyn tólemegen.
Negizgi qaryz 283 mln teńgege jýyqtasa, 72 mln teńgeden astamy – ósimpul.
Sondaı-aq, múlik salyǵyn tólemeı júrgen atyraýlyqtardyń qaryzy - 385 mln teńge.
Belgili bolǵandaı, byltyrǵy 1 tamyzdaǵy málimetke sáıkes 22,8 myń adamnyń múlik salyǵy 385,1 mln teńgege jetken.
Onyń ishinde Atyraý qalasynda turatyn 17,5 myń adamnyń bereshegi 309,2 mln teńgeni quraǵan.