25 maýsymǵa deıin jańa jumys oryndaryn esepke alý ádistemesin jasaý kerek - Smaıylov
«Bıyl Ulttyq jobalardy iske asyrý aıasynda shamamen 270 myńdaı turaqty jumys orny qurylýy tıis. Bul jospar oryndalýy kerek. «Baqytty otbasy» jobasy aıasynda 20 myń áıelge jumyspen qamtý sharalary kórsetiledi. Kásipkerlik negizderin oqytý jumyspen qamtýdyń tıimdi quralyna aınaldy. Ótken jyly osyndaı kýrstarda 33 myńnan astam adam oqyp, onyń 15 myńy óz bıznesin ashty», - dedi Á. Smaıylov Úkimettiń búgingi otyrysynda.
Bul rette business.enbek.kz. biryńǵaı kásipkerlik bastamalardy qoldaý portaly arqyly kásipkerlik negizderine oqytý men granttar berý boıynsha bıznes-protsester avtomattandyrylǵan.
«Prezıdenttiń tapsyrmasymen bıyldan bastap, memlekettik organdar men barlyq deńgeıdegi ákimdikterdiń jumysynyń tıimdiligi jańa jumys oryndaryn qurý boıynsha KPI negizinde baǵalanatynyn esterińizge salamyn. Osyǵan oraı mynadaı tapsyrmalardy beremin. Birinshi, Eńbek mınıstrligi salalyq memlekettik organdarmen, ákimdiktermen jáne bıznespen birlesip, jobalar men baǵdarlamalardy iske asyrý esebinen turaqty jumys oryndaryn kóbeıtýdi qamtamasyz etsin», - dedi Premer.
Ekinshiden, Eńbek mınıstrligi ákimdiktermen birlesip, jastarmen jáne áleýmettik jaǵynan az qamtylǵan azamattarmen jumys isteý úshin jumyspen qamtý ortalyqtarynda «bir tereze» tásilin jasaý tapsyryldy.
«Úshinshiden, Eńbek mınıstrligi múddeli memlekettik organdarmen birlesip, tsıfrlyq platformalar aıasynda jumys isteıtin adamdarǵa áleýmettik kepildikter berý úshin zańnamany jetildirý boıynsha usynystar engizsin. Tórtinshiden, Eńbek mınıstrligi Ulttyq ekonomıka mınıstrligimen birlesip, 25 maýsymǵa deıin ákimderdi baǵalaý úshin árbir 10 myń turǵynǵa shaqqanda keminde 100 jańa jumys orny ındıkatoryn belgilep, jańa jumys oryndaryn naqty esepke alý ádistemesin bekitsin», - dedi Álıhan Smaıylov.
Sonymen birge, Úkimet basshysy ákimdikterge sýbsıdııalanatyn jumyspen qamtý baǵdarlamalaryna qatysýshylardyń keminde 60%-yn turaqty jumysqa ornalastyrý qajettigin aıtty.