24 saǵat jumys isteıdi - Ilon Masktyń anasy uly týraly aıtty
Meı Mask Respýblıka saraıynda otyrǵan 3 myń kórermenniń kókeıindegi saýalǵa jaýap berdi. Aıta keteıik, mártebeli meımannyń eki uly, bir qyzy bar. Olar - Ilon Mask, Kımbal Mask jáne qyzy Toska Mask.
Ilon Mask - kásipker (SpaceX, Tesla). Kımbal Mask – restorator. Toska Mask - kınorejısser jáne Passionflix negizin qalaýshy.
«Men balalarymdy maqtan tutamyn jáne olardyń tańdaýyna aralaspaýǵa tyrysamyn. Olardyń árqaısysy ómirde óz jolyn tapty. Kımbal bıznes salasy boıynsha bilim aldy. Toska kınony jaqsy kórdi jáne kınoındýstrııada bolýdy armandady. Biz onyń zańger bolǵanyn qaladyq, biraq ol romantık áıelder týraly fılm túsirgisi keletinin aıtty. Biz Ilondy maqtan tutamyz. Ol álemge kóp jaqsylyq jasaıtyn tulǵa. Ony árdaıym qoldaımyz, biraq onyń ornynda bolǵymyz kelmeıdi. Óıtkeni, qaýip kóp. Túngi saǵat 12-de barlyq áriptesterin jınap, jınalys ótkizedi. 24 saǵat jumys isteıdi. Eńbeginiń nátıjesin kórip júrsizder», - dedi Meı Mask.
Sonymen qatar, Meı Mask Ilonǵa qatysty bir oqıǵany aıtyp berdi.
«PayPal-dy satqannan keıin, Ilon menen endi nemen aınalysaıyn dep surady. Zymyrandar, elektromobılder nemese kún energııasy. Anasy retinde oǵan bireýin tańdap, azdap demalýǵa keńes berdim, óıtkeni ol kóp jumys isteıdi. Biraq, kórip otyrǵandaryńyzdaı, ol meni tyńdamady jáne osy úsh baǵytty da tańdady», - dep bólisti Meı Mask.
Osyǵan deıin 76 jastaǵy kanadalyq-ońtústik afrıkalyq model Qazaqstanǵa kelgenine óte qýanyshty ekenin jetkizgen edi.