24-30 maýsymda bos jumys oryndarynyń onlaın jármeńkesi ótedi – Eńbek mınıstrligi

NUR-SULTAN. QazAqparat – 24-30 maýsym kúnderi bos jumys oryndarynyń alǵashqy onlaın-jármeńkesi ótedi. Bul týraly QR Eńbek jáne halyqty áleýmettik qorǵaý mınıstri Tamara Dúısenova aıtty, dep habarlaıdy QazAqparat tilshisi.

«Birinshi kezektegi másele – jastardy jumysqa tartý. Bul úshin iri jáne orta kásiporyndardaǵy bos jumys oryndaryna onlaın jármeńke ótkizý arqyly jastardy eńbekpen qamtýdy qolǵa aldyq. Bıyl mamyr aıynda ERG kompanııalar tobymen birlesip, bilim berý uıymdarynyń túlekterin jáne 35-ke deıingi jastardy jumysqa ornalastyrýdyń onlaın-jármeńkesi pılottyq rejımde ótti. Kompanııa 350 jumys ornyn usyndy. Bir apta ishinde jumys berýshiniń talaptaryna saı keletin 159 jas irikteýden ótip, jumysqa qabyldandy. Olardyń arasynda elimizdiń barlyq óńiriniń ókilderi bar», - dedi T. Dúısenova Úkimet otyrysynda.

Pılottyq jobanyń qorytyndysyn Bilim jáne ǵylym, Ulttyq ekonomıka, Tsıfrlyq damý mınıstrlikteri, taý-ken, metallýrgııa salasyndaǵy kásiporyndar jáne «Samuryq-Qazyna» aktsıonerlik qoǵamynyń ókilderi jan-jaqty zerdelegen.

«Sonyń nátıjesinde bul kompanııalarmen «osy jyl sońyna deıin elektrondy eńbek bırjasyna 20 myń bos jumys ornyn ornalastyrý týraly» kelisimge keldik. Onyń ishinde IT salasy men «Aýyl – el besigi» jobasy da bar. Bos oryndardyń alǵashqy onlaın-jármeńkesi 24-30 maýsym aralyǵynda ótedi. Keleshekte aı saıyn turaqty túrde uıymdastyrý kózdelip otyrǵan jármeńke tek kásiporyn ornalasqan aımaq turǵyndaryna ǵana emes, barlyq qazaqstandyqtarǵa birdeı qoljetimdi bolýyn, jumysqa qabyldaý protsesiniń ashyqtyǵyn, jumys izdeýshiniń maqsatty tańdaýyn jáne jumys berýshilerdiń sapaly irikteý múmkindigi bolýyn qamtamasyz etedi», - dedi Tamara Dúısenova.

Osyǵan deıin Qazaqstandaǵy jumys kúshiniń 60% mıllenıaldar men Z býyn enshisinde ekeni jazyldy.