23 myń qazaqstandyq jalǵa beriletin turǵyn úıge sýbsıdııa alýǵa shaqyrtý alady

NUR-SULTAN. QazAqparat – Erteń 23 myń Qazaqstan azamaty memleketten bireletin turǵyn úı jaldaýǵa sýbsıdııa alý úshin ótinim berýge shaqyrtý alady. Bul týraly Qurylys jáne turǵyn úı kommýnaldyq sharýashylyq isteri komıtetiniń tóraǵasy Almas Ydyrysov málim etti, dep habarlaıdy QazAqparat tilshisi.

«Bizdiń bank jalǵa beriletin turǵyn úı sýbsıdııasyna ótinimderdi qabyldaı bastady. Qabyldaý bıyl 18 sáýirden qolǵa alyndy. Atalǵan baǵdarlamaǵa qatysa alatyn 70 myń qazaqstandyqtyń 12 myńyna Otbasy banktiń atynan habarlama jiberildi. Erteń taǵy 23 myń azamatqa jalǵa beriletin turǵyn úı sýbsıdııasyn alýǵa shaqyrtý habarlamasy jiberiledi. Respýblıkalyq jáne jergilikti bıýdjetten qarjy túskennen keıin sýbsıdııa berýdi bastaımyz dep otyrmyz», - dedi «Otbasy bank» AQ basqarma tóraǵasy Lázzat Ibragımova Ortalyq kommýnıkatsııalar qyzmeti alańynda ótken baspasóz máslıhatynda.

Bank basshysynyń aıtýynsha, ótinish berý úshin kezekke turyp, bankke kelýdiń qajeti joq. Ótinim onlaın formatta qabyldanady.

«Jalǵa beriletin turǵyn úı sýbsıdııasyn alýǵa myna 4 sanatqa jatatyn Qazaqstan azamattary jatady. 1 jáne 2 toptaǵy múgedekter, múmkindigi shekteýli bala tárbıelep otyrǵan otbasylar, kópbalaly otbasylar, jetim nemese ata-anasynyń qamqorlyǵynan aırylǵan balalar», - deıdi ol.

Aıta keteıik, búginde 601 myń qazaqstandyq turǵyn úı kezeginde tur. Onyń ishinde 215 myńy kópbalaly otbasy, 1 jáne 2 toptaǵy múgedek, jetim balalar jáne múgedek balasy bar otbasylar.