23 myń 472 adam «Almaty Birgemiz» qorynan 50 myń teńgeden kómek alady

ALMATY. QazAqparat - Almatyda 23 myń 472 adam «Almaty Birgemiz» qorynan 50 myń teńge kóleminde kómek alady. Bul týraly Nur Otan partııasynyń Almaty bólimshesi tóraǵasynyń orynbasary Stanıslav Kankýrov aıtty, dep habarlaıdy QazAqparat tilshisi.

Koronavırýstyń pandemııasyna baılanysty Elbasy, Nur Otan partııasynyń Tóraǵasy Nursultan Nazarbaevtyń bastamasymen halyqtyń áleýmettik turǵydan osal toptaryn qoldaý boıynsha birqatar keshendi sharalar uıymdastyrylǵan bolatyn.

«Asa qajettilikti talap etetin azamattarǵa ataýly kómek kórsetý maqsatynda «Birgemiz» respýblıkalyq korynan qarjylandyrylatyn «Almaty Birgemiz» qory quryldy. «Almaty Birgemiz» qory asa muqtaj azamattarǵa, atap aıtsaq az qamtylǵan kóp balaly otbasylarǵa (ataýly áleýmettik kómek alatyndar), birinshi top múgedekterine, erekshe qajettiligi bar balalardy tárbıelep otyrǵan otbasylarǵa, eń tómengi nemese bazalyq zeınetaqy alatyndarǵa (38 686 jáne 16 839 tengeden tómen), tul jetimderge 50 myń teńgeden qarjy bólip otyr. Almatyda mundaı sanatqa jatatyn 23 myń 472 adam turady. Bul tizim QR Eńbek jáne halyqty áleýmettik qorǵaý mınıstrliginiń derekterine sáıkes jasaldy», - dedi Stanıslav Kankýrov.

Onyń aıtýynsha, eger kómek alýshy atalǵan sanatqa kiretin bolsa, onda ol adamǵa kómek avtomatty túrde kórsetiledi. Eshqaıda barýdyń qajeti joq. Aqsha járdemaqy nemese zeınetaqy túsip júrgen kartochkaǵa «Almaty Birgemiz» qory men Nur Otan partııasynyń atynan sms-habarlandyrýmen birge túsedi.

Búgin 21 myńnan astam adamǵa qarjylaı kómek kórsetilgen. Qalǵan azamattarǵa aqshalaı kómek 5 kún ishinde túsedi. Aıtylǵan aqsha aıyppul, nesıe jáne basqa da tólemder esebine ustalmaıdy.

Sondaı-aq, «Birgemiz» qory tarapynan Almaty qalasyna 2 mln medıtsınalyq maska jiberiledi. Ol maska 40 myń muqtaj adamǵa taratylady.

Almaty qalasy ákimdiginiń qoldaýymen ashylǵan «Jańa Alataý» qorynyń shotyna QR Tuńǵysh Prezıdenti-Elbasy Qory, sondaı-aq Nur Otan partııasynyń depýtattary, kásipkerler, kásiporyndar, partııa músheleri jáne qarapaıym azamattar qarajat aýdardy. Olar negizinen az qamtylǵan azamattar úshin azyq-túlik sebetin satyp alýǵa jáne basqa da qajettilikterge baǵyttalǵan.

«Búginde «#BizBirgemiz» aktsııasy aıasynda Nur Otan partııasy 4,5 myńnan astam otbasyn azyq-túlikpen qamtamasyz etti», - dedi Stanıslav Kankýrov.