23 myń áskerı qyzmetker men 2 myń tehnıka: BAÁ óz tarıhyndaǵy eń iri áskerı paradty ótkizdi

<p>ASTANA. KAZINFORM &ndash; Birikken Arab Ámirlikteri óziniń Ulttyq kúnin el tarıhyndaǵy eń úlken áskerı sherýmen atap ótti. Bul týraly <a href="https://www.wam.ae/en/article/b6hmudj-mohammed-bin-rashid-attends-uae-armed-forces%E2%80%99" target="_blank" rel="noopener">WAM</a> habarlady.</p>

Bul shara Ámirliktiń qurylǵanyna 53 jyl tolýyna, sondaı-aq áskerı qyzmet týraly zańnyń qabyldanǵanyna 10 jyl tolýyna baılanysty ótkizilgeni atap ótildi. Paradty BAÁ premer-mınıstri jáne Dýbaı bıleýshisi sheıh Muhammed ben Rashıd Ál Maktým júrgizdi.

Sonymen qatar, sharaǵa eldiń vıtse-prezıdenti sheıh Mansýr ben Zaıd Ál Nahaıan men Dýbaıdyń taq murageri, Qorǵanys mınıstri sheıh Hamdan ben Muhammed Ál Maktým qatysty.

Sherý Abý-Dabı men Dýbaı shekarasyndaǵy Al-Samıh aımaǵynda ótti. Dál osy jerde 1968 jyly 18 aqpanda eki ámirliktiń gýbernatorlary sheıh Zaıd ben Sultan Ál Nahaıan men sheıh Rashıd ben Saıed Ál Maktým federatsııa qurý týraly kelisimge kelgen.

Paradqa F-16 jáne Mirage 2000 joıǵysh ushaqtary, C-17 Globemaster III jáne C-130 Hercules áskerı-kólik ushaǵy, AH-64 Apache jáne CH-47 Chinook tikushaqtary qatysty. Merekelik sherýge barlyǵy 23 myń áskerı qyzmetker men 2 myń tehnıka qatysty.

BAÁ qarýly kúshteriniń ókili polkovnık Djamal ál-Balýshıdiń aıtýynsha, bul shara el tarıhyndaǵy eń iri áskerı parad boldy jáne oǵan daıyndyq birneshe aıǵa sozylǵan.

Anyqtama úshin, BAÁ úkimeti 2014 jyly «Ulttyq áskerge shaqyrý týraly» zańdy qabyldady. Onyń aıtýynsha, áskerı qyzmetke 17 men 30 jas aralyǵyndaǵy densaýlyǵynda aqaýy joq er azamattardyń barlyǵy alynady. Áskerı qyzmet ótkerý merzimi áskerge shaqyrylýshynyń bilim deńgeıine baılanysty 11 aıdan 36 aıǵa deıin sozylady. Áıelder áskerı qyzmetti óz erkimen óteı alady, olar úshin qyzmet etý merzimi 11 aımen shektelgen.